कोरबानगरम्, २० फरवरीमास: (हि.स.)। भारत-सर्वकारस्य आयुष्मानभारतयोजना-अन्तर्गतं प्रवर्तितं आयुष्मान-वय-वन्दना-पत्रकम् पुनरपि आवश्यकताग्रस्ताय वरिष्ठ-नागरिकाय संजीवन्याः कार्यं कृतवत्। कोरबा-जनपदस्य करतला-तहसील-अन्तर्गतस्य मडवाराणी-ग्रामनिवासिनः ७०-वर्षीयस्य शंकरलालस्य योजनायाः अन्तर्गतं प्रायः १,२७,९३०-रूप्यक-मूल्यस्य उपचारः पूर्णतया निःशुल्कं लब्धः।

दैनन्दिन-श्रमे परिवार-पालनं कुर्वन् शंकर-लालः सीमित-आयत्वात् दीर्घकालं स्वास्थ्य-समस्यासु सति अपि नियमित-चिकित्सां कर्तुं नाशक्नोत्। अद्यतन-काले तस्मै श्वास-प्रश्वासे गम्भीरा बाधा अभवत्। स्वास्थ्य-स्थितेः अवनतौ परिजनैः सः कृष्णा-चिकित्सालये प्रवेशित:। चिकित्सकीय-परीक्षायां तस्य फुफ्फुसेषु संक्रमणं दृष्टं, यस्य त्वरित-उपचारः आवश्यकः आसीत्।

परिवारस्य आर्थिक-दौर्बल्यात् उपचार-व्यय-विषये चिन्ता वर्धिता। तस्मिन्नन्तरे आयुष्मान-वय-वन्दना-पत्रकस्य विषये सूचना लब्धा। पात्रता-सत्यापनानन्तरं योजनान्तर्गतं तस्य उपचारः अनुमोदितः, तथा प्रायः १.२७-लक्ष-रूप्यकं समग्रं व्ययं योजना एव निरवहत्। सफल-उपचारानन्तरं शंकर-लालः सम्प्रति स्वस्थः सन् सामान्यं जीवनं यापयति।

शंकर-लालः शासनं स्वास्थ्य-विभागं च प्रति कृतज्ञतां व्यक्तवान्, अवदच्च—यदि योजनायाः सूचना नालभ्येत, तर्हि उपचारः सम्भव: न भवेत्। सः अन्यान् आवश्यकताग्रस्तान् अपि योजनाया: लाभं ग्रहीतुं आह्वानं कृतवान्।

जनपद-प्रशासनं सर्वान् पात्रान् वरिष्ठ-नागरिकान् आयुष्मान-वय-वन्दना-पत्रकपञ्जीकरणाय प्रेरयति। प्रशासनस्य कथनं यत्—आर्थिक-अभावात् कश्चन नागरिकः उपचारात् वञ्चितो न भवेत् इति शासनस्य प्राथमिकता। एषा योजना वरिष्ठ-नागरिकाणां स्वास्थ्य-सुरक्षायाः विश्वसनीयः आधारः भूत्वा नूतनाम् आशां सञ्जनयति।

हिन्दुस्थानसमाचार: / हरीश: तिवारी

हिन्दुस्थान समाचार / अंशु गुप्ता