Enter your Email Address to subscribe to our newsletters
देहरादूनम्, 17 दिसंबरमासः (हि.स.)।
मुख्यमन्त्रिणः पुष्करसिंहधामिनः किसानहितैषिण्यः तथा सहकारितामूलिकाः नीतयः इदानीं केवलं योजनासु न सीमिताः सन्ति अपि तु तासां प्रत्यक्षः प्रभावोऽपि दृश्यते। पौडीगढवालजनपदे दूरस्थे ग्राम्यप्रदेशे स्थिते पाबौविकासखण्डे ढिकवालीनाम्नी साधनसहकारिसमितिः अस्मिन् वर्षे प्रथमवारं संयुक्तसहकारिकृषेः अन्तर्गतं पुष्पकृषेः आरम्भं कृतवती।
अक्टोबरमासात् आरब्धायाम् अस्याम् अभिनवायां प्रवृत्तौ कृषकाणां सामूहिकसहभागिता कृषिं परम्परागतमार्गात् निष्कास्य आयवर्धकव्यावसायिकसम्भावनानां दिशि नीतवती। परियोजनायाः अन्तर्गतं इदानीं यावत् गुलदावरीपुष्पाणां ११९० गुच्छाः ग्लेडियसपुष्पाणां च २६३० गुच्छाः छेदनं कृत्वा दिल्लीदेहरादूनयोः मण्डीषु विपणनं कृतम्। अनेन समितेः त्रिलक्षपञ्चदशसहस्रद्विशतशतदशरूप्यकाणां अधिका आयः जाता। अद्यापि पुष्पच्छेदनं विक्रयश्च निरन्तरं प्रवर्तते।
अस्यां संयुक्तसहकारिकृषौ एकचत्वारिंशत् कृषकाः सम्बद्धाः सन्ति ये एकाशीत्यधिकशतत्रयनालिकाभूमौ पुष्पकृषिं कुर्वन्ति। प्रथमचरणे पञ्चाशन्नालिकाभूमौ गुलदावरीग्लेडियसयोः कृषिः कृता या परियोजनायाः दृढां आधारशिलां स्थापितवती। कृषकाणां उत्साहः तथा बाजारात् लभ्यमाना सकारात्मकप्रतिक्रिया अस्य प्रयासस्य अधिकं सशक्तीकरणं कुर्वन्ति।
परियोजनायाः वेगवर्धनाय सहकारिताविभागेन सञ्चालितायां राज्यस्तरीयसहकारिविकासपरियोजनायां सप्तलक्षसप्तपञ्चाशत्सहस्ररूप्यकाणां वित्तीयसहायता प्रदत्ता। आगामिचरणे फेब्रुवरीमासात् द्विसहस्रषड्विंशतितमे वर्षे एकशतपञ्चाशन्नालिकाभूमौ ग्लेडियससूर्यमुखीगुलदावरीणां रोपणस्य योजना प्रस्ताविता अस्ति यस्याः पूर्वतैयार्यः आरब्धाः सन्ति।
जिलाधिकारी स्वातीएसभदौरिया बुधवासरे अस्याः पहलायाः प्रशंसां कृत्वा अवदत् यत् यदा कृषकाः सहकारितामाध्यमेन शासकीयसहाय्यया तकनीकनिर्देशनेन तथा बाजारसम्बन्धेन योज्यन्ते तदा ग्राम्यआर्थिकव्यवस्थायां उल्लेखनीयः परिवर्तनः सम्भवति। सा अवदत् यत् सहकारिता नवाचारः शासकीयसहयोगश्च एतेषां समन्वयेन पर्वतीयप्रदेशेष्वपि कृषिं लाभकारिणीं कृत्वा ग्राम्यजीविकायाः नवान् द्वारान् उद्घाटयितुं शक्यते। जिलाप्रशासनं एतादृशान् नवाचारान् निरन्तरं प्रोत्साहयिष्यति येन कृषकाणां आयायां स्थायिवृद्धिः भवेत् ग्रामाश्च आत्मनिर्भराः स्युः।
हिन्दुस्थान समाचार