Enter your Email Address to subscribe to our newsletters
नगरीय-सेवायां च शून्य-अपशिष्ट (जीरो वेस्ट) प्रतिरूपे च उत्कृष्ट-कार्याय सम्मानः
वाराणसी, 17 दिसम्बरमासः (हि.स.)।उत्तरप्रदेशस्य वाराणसी-छावनी-परिषद् नगरीय-सेवासु उत्कृष्ट-कार्यकरणेन, ठोस-अपशिष्ट-प्रबन्धने नवाचारैः, तथा अवकर-शून्यीकरणस्य (जीरो वेस्ट) दिशि प्रभावी-प्रयत्नैः च वर्ष 2025 इत्यस्य रक्षा-मंत्री उत्कृष्टता-पुरस्कारं प्राप्य सम्मानितः अभवत्। एषः प्रतिष्ठितः पुरस्कारः भारतस्य रक्षा-मन्त्री राजनाथ-सिंहेन वाराणसी-छावनी-परिषदः मुख्य-कार्यपालक-अधिकारी (सीईओ) सत्यं मोहनाय तस्य दलाय च प्रदानः कृतः।
पुरस्कार-प्राप्त्यनन्तरं सीईओ सत्यं मोहनः छावनी-परिषदस्य अधिकारीणां कर्मचाऱिणां च, विशेषतः स्वच्छता-कर्मिणां, हार्दिकम् अभिनन्दनं कृत्वा तेषां सहयोगाय समर्पणाय च कृतज्ञतां प्रकटितवान्। स उवाच—एषः सम्मानः छावनी-परिषदस्य कार्यप्रणाल्याः, पर्यावरण-हितैषी-नीतीनां, तथा सामुदायिक-सहभागिता-आधारित-विकास-प्रतिरूपस्य प्रमाणम् अस्ति।
सीईओ अवदत् यत् छावनी-परिषद् नागरिक-सुविधानां निरन्तर-परिष्काराय नूतन-नूतन-नवाचारान् अमलयति। रक्षा-मन्त्रिणः हस्तात् प्राप्तः अयं पुरस्कारः भूमिस्तरे कार्यं कुर्वतां कर्मिणां, विशेषतः ‘स्वच्छता-मित्राणां’, कृते अत्यन्तं प्रेरकः उत्साहवर्धकश्च अस्ति।
तेन अवगतं कृतं यत् छावनी-परिषदेन गृह्य-व्यावसायिक-प्रतिष्ठानेभ्यः उत्पाद्यमानं अवकरं स्रोत एव पृथक्करणेन, सुरक्षित-सुव्यवस्थित-संग्रहेण, वैज्ञानिक-प्रक्रियाकरणेन च शून्य-अपशिष्ट-दिशि उल्लेखनीय-कार्यं कृतम्। अनेन सह स्वच्छतायाः अपशिष्ट-प्रबन्धनस्य च प्रति नागरिकान् जागरूकर्तुं निरन्तरं जन-जागरूकता-अभियानानि अपि सञ्चालितानि, येषां व्यापकः सकारात्मकः प्रभावः दृश्यते।
पूर्वं छावनी-परिषद् अवकरात् अवकरं संगृह्य नगर-निगमस्य करसड़ा-स्थित-अवकर-निस्तारण-केन्द्रं प्रेषयति स्म, येन महती धनराशिः व्ययीभवति स्म। अधुना तु वाराणसी-छावनी-परिषदस्य सैनिटेशन-उद्याने एव ठोस-अवकरस्य वैज्ञानिकं निस्तारणं क्रियते।
वर्तमान-स्थितौ छावनी-परिषदेन शत-प्रतिशतं द्वारात्-द्वारं अवकर-संग्रहणम्, सर्वेषां विशाल-समुदाय-बिनानां पूर्ण-निष्कासनम्, तथा पुरातन-डम्प-साइटस्य हरित-प्रदेशे परिवर्तनं च प्रगतौ वर्तते। एतेषां नगरीय-प्रबन्धनस्य समेकित-प्रयत्नानां फलस्वरूपं गत-एक-वर्षे वाराणसी-छावनी-परिषद् स्वच्छता-सर्वेक्षण–2024 मध्ये सप्तमीं श्रेणीं (7वीं रैंक) प्राप्तवती, सेवास्तरे च निरन्तरः परिष्कारः अभिलेखितः।
हिन्दुस्थान समाचार / Dheeraj Maithani