“परिसरस्य परिवर्तितं स्वरूपं तथा अस्माकं भूमिका” इति सत्रे मूल्याधारित-शिक्षायाः मार्गः स्पष्टः

जौनपुर-जनपदः, ३० दिसम्बरमासः (हि.स.)। अखिल-भारतीय-विद्यार्थी-परिषदः काशी-प्रान्तस्य पञ्चषष्टितमं प्रान्त-अधिवेशनं २९ तः ३१ दिसम्बरपर्यन्तं जौनपुर-स्थिते वीर-बहादुर-सिंह-पूर्वाञ्चल-विश्वविद्यालये अस्थायी-रूपेण स्थापिते ‘रानी-अब्बक्का-नगर’ इति परिसरे आयोज्यते। मङ्गलवासरे अधिवेशनस्य द्वितीये दिने “परिसरस्य परिवर्तितं स्वरूपं तथा अस्माकं भूमिका” इति विषयक-भाषण-सत्रे अभाविप-इत्यस्य राष्ट्रीय-सङ्घटन-मन्त्री आशीष-चौहानः मार्गदर्शकं वक्तव्यं दत्तवान्।

समानन्तर-सत्रेषु अपि अस्मिन् एव विषये कार्यकर्तृभिः छात्र-नेतृभिश्च विमर्शः कृतः। भाषण-सत्रानन्तरं मोहम्मद्-हसन-स्नातकोत्तर-महाविद्यालयात् टी.डी.-महाविद्यालयं यावत् नगरस्य प्रमुख-मार्गेषु प्रायः चतुर्किलोमीटर-परिमाणायाः भव्य-शोभायात्रायाः आयोजनं कृतम्। अस्याः शोभायात्रायाः जौनपुर-नागरिकैः प्रमुख-चतुष्पथेषु पुष्पवर्षया उत्साहपूर्णैः जयघोषैश्च हार्दिकं स्वागतं कृतम्।

अभाविप-इत्यस्य काशी-प्रान्तस्य अधिवेशनं २९ दिसम्बरात् आरब्धं, यस्मिन् प्रान्तस्य अष्टादश-साङ्घटनिक-जनपदेभ्य: आगतैः प्रायः ८५० कार्यकर्तृभिः सहभागिता कृता। मङ्गलवासरे सायङ्काले भव्य-शोभायात्रा निर्गता, यस्यां “पृथक्-भाषा पृथक्-वेशः, तथापि एकं राष्ट्रम्” इति भावना सजीव-रूपेण दृष्टा। काशी-प्रान्तस्य विभिन्न-परिसरेभ्यः आगतैः विद्यार्थिभिः स्वस्व-पारम्परिक-वेशैः, लोक-नृत्यैः, सांस्कृतिक-प्रस्तुतिभिः, झाङ्काभिश्च भारतीय-संस्कृतेः विविधता-एकतयोः दिव्यं दर्शनं प्रदत्तम्। यात्रायाः समये सम्पूर्णं नगरं “भारत-माता-की-जय” तथा “कश्मीरात् कन्याकुमार्यन्तं भारत-माता एका अस्माकम्” इत्यादिभिः ओजस्वी-उद्घोषणाभिः गुंजायमानम् अभवत्। एषा शोभायात्रा कोतवाली-चतुष्पर:, किला-मार्गः, कीर्तिकुञ्जः, ओलन्दगञ्जः, जेसिस-चौराहः इत्यादि प्रमुख-मार्गान् अतिक्रम्य टी.डी.-महाविद्यालये सम्पन्ना।

शोभायात्रानन्तरं टी.डी.-महाविद्यालयस्य क्रीडाङ्गणे मुक्त-अधिवेशनम् आयोजितम्, यत्र अभाविपस्य राष्ट्रीय-मन्त्री अभय-प्रताप-सिंहस्य नेतृत्वे विभिन्न-जिल्यः शैक्षणिक-परिसरेभ्यश्च आगताः छात्र-नेतारः शिक्षाविषये, बाङ्ग्लादेशीय-घुसपैठ-विषये, समाज-विषये, युवा-शक्ति-विषये तथा ‘ऑपरेशन-सिन्दूर’ इत्यादिषु विषयेषु प्रेरणादायकं वक्तव्यं दत्तवन्तः। अस्मिन् अवसरॆ काशी-प्रान्तस्य अध्यक्षः डाॅ.महेन्द्र-त्रिपाठीः तथा प्रान्त-मन्त्री शिवम-सिंहः अपि प्रतिनिधीन् सम्बोधितवन्तौ।

विभिन्नेषु वक्तृसु राष्ट्रीय-मन्त्री अभय-प्रताप-सिंहः शैक्षणिक-परिसराणां समस्या: निरूपितवान्, प्रान्त-मन्त्री शिवम-सिंहः बाङ्ग्लादेशीयै: राष्ट्रीय-प्रभावं प्रकाशयत्, प्रियांशु-वर्मा “अद्यतन-युवा, श्वस्तन-राष्ट्र-निर्माता” इति विषयं प्रस्तुतवान्, शिवबाबु-चौधरी खाद्य-पदार्थेषु मिलावट-निवारणस्य आवश्यकताṃ प्रतिपादितवान्, आर्. चित्रा “सशक्ता नारी, समृद्धं भारतम्” इति विषयं अवदत्, तथा शुभश्री-रणजीत ‘ऑपरेशन-सिन्दूर’ विषये प्रभावी वक्तव्यं दत्तवती। अन्ते प्रान्त-अध्यक्षेण डाॅ. महेन्द्र-त्रिपाठिना आभार-प्रदर्शनपूर्वकं कार्यक्रमः समापितः।

हिन्दुस्थान समाचार / अंशु गुप्ता