Enter your Email Address to subscribe to our newsletters
जमशेदपुरम् , 14 जनवरीमासः (हि.स.)।नगरमध्ये बुधवासरे षट्तिला-एकादश्याः पावने अवसरे श्रद्धा-भक्त्योः विशेषो भावः दृश्यते स्म। बहवः श्रद्धालवः सोनारी-दोमुखानी तथा मानगो-प्रदेशे स्थिते स्वर्णरेखा-नद्याः तीरे समागताः, विधि-विधानपूर्वकं पवित्रं स्नानं कृतवन्तः। स्नानानन्तरं तैः तिलदानं, अन्नदानं, वस्त्रदानं तथा धनदानं च कृत्वा पुण्यलाभः कृतः। प्रातःकालादेव नदीघाटेषु श्रद्धालूनां आवागमनं निरन्तरं आसीत्, येन सम्पूर्णं क्षेत्रं धार्मिकोल्लासेन परिपूर्णं अभवत्।
हिन्दूपञ्चाङ्गानुसारं षट्तिला-एकादशी-व्रतं बुधवासरे, १४ जनवरी २०२६ तिथौ आचरितम्। अस्य व्रतस्य विशेषं महत्त्वं शास्त्रेषु वर्णितम्। मान्यते यत् षट्तिला-एकादशी-व्रतस्य आचरणेन पुरातनपापानां नाशः भवति, तथा च जीवने सुख-समृद्धि-धनधान्यप्राप्तिः जायते। अस्मिन् दिने तिलस्य विशेषं महत्त्वं विद्यते। तिलदानं, तिलहवनं, तिलयुक्तभोजनं तथा तिलप्रयोगः दरिद्रतां निवारयति, लक्ष्मीदेव्याः विशेषां कृपां च ददाति।
धार्मिकमान्यतानुसारं एतद्व्रतं मनोवाक्कायानां शुद्धिं करोति तथा मनुष्यं मोक्षमार्गे अग्रसरं करोति। विशेषतः माघमासे कृतं दानं पुण्यकर्म च द्विगुणफलदायकं मन्यते, अत एव श्रद्धालुषु अस्य व्रतस्य विषये विशेषो उत्साहः दृश्यते स्म।
पण्डितः संजय तिवारी इति विद्वान् वदति यत् अस्मिन् वर्षे षट्तिला-एकादश्याः महत्त्वं अधिकं वर्धितम्, यतः एषा वर्षस्य प्रथमा एकादशी अस्ति तथा मकरसंक्रान्त्या सह दुर्लभः संयोगः अपि जातः। ज्योतिषाचार्याणां मते १४ जनवरी तिथौ अपराह्णे त्रिवादने सूर्यदेवः मकरराशौ प्रवेशं करिष्यति। अनेन कारणेन एकादशीव्रतस्य पुण्यफलं बहुगुणितं भविष्यति। तस्मिन् दिने सर्वार्थसिद्धियोगः अमृतसिद्धियोगः च इत्यादयः अत्यन्तशुभाः संयोगाः अपि भवन्ति, ये धार्मिककर्मसु व्रतेषु दानपुण्येषु च विशेषफलदायकाः मन्यन्ते।
तेन उक्तं यत् अस्मिन् शुभसंयोगे कृतं स्नानं दानं व्रतं च जीवनस्य अनेकान् विघ्नान् निवारयति तथा सकारात्मकशक्तेः संचारं करोति। एतादृश्याः आस्थायाः कारणेन जमशेदपुर-नगरे नदीतीरेषु प्रातःकालादेव श्रद्धालूनां महती भीडः समागतवती, येन सम्पूर्णं वातावरणं भक्तिमयम् अभवत्।---------------
हिन्दुस्थान समाचार