बेङ्गलूरुनगरम्, १६ जनवरीमास: (हि.स.)। कर्नाटकस्य मुख्यमन्त्री सिद्धारमैय्या अवदत् यत् प्रत्येकं मतं पवित्रं भवति, तथा च लोकतन्त्रं तदैव जीवितं तिष्ठति यदा तस्य संरक्षणसम्बद्धाः उपायाः प्रभावै: विधिभिः कार्यान्विताः भवन्ति। एषा टिप्पणी शुक्रवासरे बृहन्मुम्बई-नगर-निगमस्य (बीएमसी) निर्वाचनसम्बद्धे कथिते ‘अमिट-स्याही’ विवादसन्दर्भे कृता।

सामाजिक-माध्यमेषु प्रकाशिते वक्तव्ये मुख्यमन्त्री सिद्धारमैय्या अवदत् यत् सञ्चारमाध्यम-प्रतिवेदनानि तथा सामाजिक-माध्यमेषु प्रसारितानि दृश्यचित्राणि सूचयन्ति यत् मतदानकाले प्रयुज्यमाना ‘अमिट’ स्याही सैनिटाइजर-एसीटोन-इत्यादि रसायनानां साहाय्येन सहजतया अपसारयितुं शक्या अस्ति। तेन एतादृशैः प्रकाशनैः निर्वाचन-प्रक्रियायाः विश्वसनीयतायां गम्भीराः प्रश्नाः उद्भूताः सन्ति, तथा च एषः विषयः महाराष्ट्रस्य सीमाः अतिक्रम्य सम्पूर्णे देशे चर्चायाः विषयः जातः।

मुख्यमन्त्री अवदत् यत् एषा घटना न केवला एकाकिनी, अपि तु मतदानस्य पवित्रतासम्बद्धानां तेषां चिन्तानां भागः अस्ति याः कालान्तरं कालान्तरं प्रकटिताः सन्ति। यथार्थानां गम्भीराणां च प्रश्नानां अस्वीकारः, ध्यान-विचलनस्य प्रयासः अथवा मौन-आश्रयणं लोकतान्त्रिक-संस्थासु जनविश्वासं दुर्बलं करोति। सः स्पष्टम् अवदत् यत् मूलभूत-सुरक्षा-उपायानां दुर्बलीकरणं तथा नागरिकाणां चिन्तानाम् अवहेलनं लोकतन्त्रस्य रक्षणं न करोति, अपि तु तस्य हानिं करोति।

मुख्यमन्त्री सिद्धारमैय्या निर्वाचन-आयोगात् अस्मिन् सम्पूर्णे विषये त्वरितं हस्तक्षेपं कर्तुम् आह्वानं कृत्वा अवदत् यत् पारदर्शिता, उत्तरदायित्वं तथा आवश्यक-संशोधनात्मक-उपायाः अवश्यमेव स्वीकर्तव्याः। लोकतन्त्रस्य सुदृढतायै निर्वाचन-प्रक्रियायां जनानां विश्वासस्य संरक्षणं परमावश्यकं भवति, तथा च अस्मिन् विषये कस्यापि स्तरस्य सन्धि: न कर्तव्यः।

हिन्दुस्थान समाचार / अंशु गुप्ता