मालदानगरम्, १७ जनवरीमासः (हि.स.)। प्रधानमन्त्री नरेन्द्रमोदी शनिवासरे अवदत् यत् अद्य पश्चिम-बङ्गाल-राज्ये रेलविकासः नूतनां गतिं नूतनांश्च आयामान् प्राप्तवान् अस्ति। एकस्मिन् पक्षे हावड़ा–गुवाहाटी-मार्गे आरब्धा देशस्य प्रथमा वन्दे-भारत-शयनयान-रेलयान-सेवा मातुः काली-देव्याः भूमिं मातुः कामाख्या-देव्याः भूम्या सह संयोजयति। अपरस्मिन् पक्षे पश्चिम-बङ्गाल-राज्यं चतुर्भिः नूतनैः अमृत-भारत-एक्सप्रेस-रेलयानैः देशस्य उत्तरी-दक्षिणी-पश्चिम-भागैः सह नूतनां सम्पर्क-व्यवस्थां प्राप्तवान् अस्ति।

प्रधानमन्त्री नरेन्द्रमोदी पश्चिम-बङ्गालस्य मालदा-टाउन-रेलस्थानकात् देशस्य प्रथमस्य वन्दे-भारत-शयनयान-रेलयानेन सहितं विविध-रेल-मार्ग-परियोजनानां च लोकार्पणानन्तरम् आयोजिते समारोहे भाषणं कृतवान्।

अस्मिन् कार्यक्रमे केन्द्रीय-मन्त्री अश्विनी-वैष्णवः, शान्तनु-ठाकुरः, सुकान्त-मजूमदारः, पश्चिम-बङ्गाल-विधानसभायां नेता-प्रतिपक्षः शुभेन्दु-अधिकारी, सांसदः शौमिक-भट्टाचार्यः, खगेन-मुर्मुः तथा कार्तिक-चन्द्रपालः अपि उपस्थिताः आसन्।

प्रधानमन्त्री अवदत् यत् पश्चिम-बङ्गालस्य विकासाय नूतन-गति-प्रदान-अभियानम् अद्य अधिकं तीव्रम् अभवत्। भारतीय-रेलयानस्य आधुनिकीकरण-दिशि एकः अन्यः महान् चरणः उपन्यस्तः। राज्येन सह सम्बद्धानां विविध-विकास-कार्याणां शिलान्यासेन लोकार्पणेन च यात्रि-सुविधा-वृद्ध्या सह व्यापारस्य रोजगारस्य च प्रोत्साहनं भविष्यति।

प्रधानमन्त्री उवाच — “बङ्गालस्य अस्याः पावनभूमेः अद्य भारतदेशे वन्दे-भारत-शयनयान-रेलयान-सेवाया: आरम्भः भवति। एताः नूतनाः वन्दे-भारत-शयनयान-रेलयानसेवा: देशवासिनां दीर्घ-यात्राम् अधिकां सौकर्यदायकाम्, उत्कृष्टां, स्मरणीयां च करिष्यन्ति। एषा वन्दे-भारत-रेलयान-सेवा ‘मेड्-इन-इण्डिया’ अस्ति। अस्य निर्माणे भारतीयानां परिश्रमः समाविष्टः अस्ति। देशस्य एषा प्रथमा वन्दे-भारत्-शयनयान-रेलयान-सेवा मातुः काली-देव्याः भूमिं मातुः कामाख्या-देव्याः भूम्यास्सह संयोजयति। अग्रिम-काले सम्पूर्णे देशे अस्याः आधुनिकताया: रेलयान-सेवायाः विस्तारः भविष्यति।”

प्रधानमन्त्री अवदत् यत् अस्याः वन्दे-भारत-शयनयान-रेलयान-सेवायाः माध्यमेन बङ्गालस्य यून: नूतनाः अवसराः प्राप्यन्ते, क्षेत्रीय-सम्पर्क-व्यवस्था च अधिका सुदृढा भविष्यति। एषा रेलयान-सेवा आत्मनिर्भर-भारतस्य शक्तेः प्रतीकः अस्ति। सः बङ्गाल-राज्यं, आसाम-राज्यं तथा सम्पूर्णं देशम् अस्याः उपलब्धेः कृते अभिनन्दितवान्।

प्रधानमन्त्री अवदत् यत् एवमेव पश्चिम-बङ्गाल-राज्यं चतस्रः अन्याः आधुनिकाः अमृत-भारत-एक्सप्रेस-रेलयान-सेवाः अपि प्राप्तवान् अस्ति। न्यू-जलपाईगुड़ी–नागरकोई, न्यू-जलपाईगुड़ी–तिरुचिरापल्ली, अलीपुरद्वार–बेंगलुरु तथा अलीपुरद्वार–मुम्बई अमृत-भारत-एक्सप्रेस-रेलयान-सेवाभिः बङ्गालस्य विशेषतः उत्तर-बङ्गालस्य दक्षिण-पश्चिम-भारतैः सह सम्पर्कः अधिकं सशक्तः भविष्यति।

गङ्गासागर-दक्षिणेश्वर-कालीघाट-दर्शनार्थम् आगच्छन्तः यात्रिणः तथा तमिलनाडु-महाराष्ट्र-यात्रायै गच्छन्तः जनाः एताभिः रेलयान-सेवाभिः अधिकं लाभं प्राप्स्यन्ति।

प्रधानमन्त्री यात्रिभिः सह संवादस्य उल्लेखं कुर्वन् अवदत् यत् पूर्वं जनाः विदेशेषु रेलयानानां चित्राणि दृष्ट्वा चिन्तयन्ति स्म — “भारतदेशे अपि एतादृशी रेलयान-सेवा भवेत्।” अद्य तु सः स्वप्नः यथार्थः अभवत्। अधुना वैदेशीयाः अपि भारतस्य मेट्रो-रेलयानानां दृश्यानि निर्मीय जगति प्रचारयन्ति यत् भारतदेशे रेल-क्षेत्रे महत् परिवर्तनं भवति।

प्रधानमन्त्री अवदत् यत् अद्य भारतीय-रेलविभाग कायाकल्प-कालं यापयति। भारतीय-रेलविभाग: न केवलं आधुनिक: भवति, अपि तु आत्मनिर्भरः अपि भवति। रेलमार्गाणां शीघ्रं विद्युत्करणं क्रियते, रेलस्थानकानि आधुनिकीक्रियन्ते, देशे अनेकाः वन्दे-भारत्-रेलयान-सेवाः सञ्चालिताः सन्ति। रेल-इञ्जिन-यानानि, वर्गया:, मेट्रो-वर्गा: च भारतदेशे एव निर्मीयन्ते।

भारतदेश: अद्य अमेरिका-यूरोप-देशेभ्यः अधिकानि रेल-इञ्जिन-यानानि निर्माति तथा बहुभ्यः देशेभ्यः यात्री-रेलयानानि, मेट्रो-वर्गान् च निर्यातयति।

प्रधानमन्त्री अवदत् यत् तीव्र-गति-युक्तानां आधुनिक-रेलयानानां व्यापकः जालः अपि निर्मीयते, यस्य महान् लाभः निर्धन-मध्यम-वर्गीय-परिवारैः अनुभूयते। एतेन न केवलम् अर्थव्यवस्था सुदृढा भवति, अपि तु यूनां कृते व्यापकं रोजगार-सृजनम् अपि भवति।

अस्मिन् अवसरे प्रधानमन्त्री पश्चिम-बङ्गाल-राज्ये चतसृणां रेल-परियोजनानां शिलान्यासं कृतवान्, यासु बालुरघाट–हिली-इत्यनयोः मध्ये नूतन-रेलमार्गः, न्यू-जलपाईगुड़ी-स्थाने माल-परिवहन-रक्षणार्थम् आधुनिक-सुविधाः, सिलीगुड़ी-लोको-शेड-इत्यस्य उन्नयनम्, जलपाईगुड़ी-स्थाने वन्दे-भारत-रेलयान-रक्षण-सुविधानाम् आधुनिकीकरणं च अन्तर्भवन्ति। सः न्यू-कूचबिहार–बामनहाट तथा न्यू-कूचबिहार–बोक्सिरहाट-मार्गयोः विद्युत्करणं राष्ट्राय समर्पितवान्।

प्रधानमन्त्रिणाऽपि दूरदर्शन-सम्पर्केण चतस्रः नूतनाः अमृत-भारत-एक्सप्रेस-रेलयान-सेवाः हरित-ध्वजेन प्रेषिताः। LHB-वर्गै: सुसज्जिते द्वे नूतने रेलयान-सेवे — राधिकापुर–बेंगलुरु-एक्सप्रेस तथा बालुरघाट–बेंगलुरु-एक्सप्रेस — अपि शुभारम्भिते। एते रेलयान-सेवे क्षेत्रस्य यूनां, छात्राणां, IT-व्यावसायिकानां च कृते बेंगलुरु-नगरं प्रति सुरक्षितां, सरलां, सौकर्यादायकां च यात्रासुविधां प्रदास्यन्ति।

प्रधानमन्त्रिणाऽपि राष्ट्रीय-राजमार्ग-31D-स्थ धूपगुड़ी–फलकाता-खण्डस्य मरम्मत-कार्यस्य तथा चतस्र-पंक्ति-निर्माण-कार्यस्य शिलान्यासः कृतः, येन क्षेत्रीय-मार्ग-सम्पर्क-व्यवस्था उन्नता भविष्यति तथा उत्तर-बङ्गाल-प्रदेशे यात्रि-माल-परिवहनम् अधिकं सुलभं भविष्यति।

हिन्दुस्थान समाचार / अंशु गुप्ता