Enter your Email Address to subscribe to our newsletters
नवदिल्ली, 02 जनवरी। रेलमन्त्री अश्विनीवैष्णवः शुक्रवासरे मुम्बई–अहमदाबाद उच्चगति-रेल-परियोजनायां (बुलेट्-रेल) ऐतिहासिक-सफलतां उद्घोषयन् अवदत् यत् महाराष्ट्रस्य पालघर-जनपदे विरार्–बोईसर् बुलेट्-रेल-स्थानकयोः मध्ये प्रायः १.५ किलोमीटर् दीर्घायां पर्वतीय-सुरङ्गायां (माउण्टेन् टनल्–५) सफलः ब्रेकथ्रू प्राप्तः अस्ति। एषा सुरङ्गा महाराष्ट्रे अस्य परियोजनायाः प्रथमः पर्वतीय-सुरङ्गा अस्ति। रेलमन्त्रीणः कथनानुसारं बुलेट्-रेल-परियोजना १५ अगस्त २०२७ पर्यन्तं पूर्णा भविष्यति।
रेलमन्त्री अश्विनीवैष्णवः शुक्रवासरे अत्र रेल-भवनात् आभासि-सम्मेलनमाध्यमेन अस्मिन् कार्यक्रमे सहभागं कृतवान्। सः अवदत् यत् एषा उपलब्धिः परियोजनायाः कृते महत्त्वपूर्णः मील्-स्तम्भः अस्ति। सः उक्तवान्— “अनेन ब्रेकथ्रू-प्राप्त्या ठाणे–अहमदाबाद् पर्यन्तं सम्पूर्णः मार्गः अधुना स्पष्टः अभवत्। केवलं मुम्बई–ठाणे मध्ये समुद्रतले स्थितः भागः एव शेषः अस्ति।”
रेलमन्त्रिणः कथनानुसारं माउण्टेन् टनल्–५ पालघर-जनपदस्य दीर्घतमासु सुरङ्गासु अन्यतमा अस्ति। अस्याः सुरङ्ग इत्यस्याः खनन-कार्यम् उभयतोऽपि कृतम्, अत्याधुनिकया ‘ड्रिल् एण्ड् ब्लास्ट्’ प्रविध्या १८ मासानां काले कार्यं सम्पन्नम्। अस्यां प्रविधौ खनन-समये भूमेः स्थितेः वास्तविक-काले निरीक्षणं शक्यते, आवश्यकतानुसारं च शॉटक्रीट्, रॉक्-बोल्ट् तथा लैटिस्-गर्डर् इत्यादीनि सुरक्षोपायानि स्वीक्रियन्ते। सः अवदत् यत् निर्माण-काले सर्वे सुरक्षा-मानदण्डाः, वायुसञ्चार-व्यवस्था तथा अग्नि-सुरक्षा-उपायाः पूर्णतया पालिताः।
सः अवदत् यत् एतस्मात् पूर्वं ठाणे–बान्द्रा-कुर्ला-समुच्चय (बी.के.सी.) मध्ये प्रायः ५ किलोमीटर् दीर्घा प्रथमाः भूमिगत-सुरङ्गा सेप्टेम्बर् २०२५ मध्ये पूर्णा अभवत्। ५०८ किलोमीटर् दीर्घायां मुम्बई–अहमदाबाद उच्चगति-रेल-परियोजनायां कुलं २७.४ किलोमीटर् दीर्घाः सुरङ्गाः सन्ति, यासु २१ किलोमीटर् भूमिगताः तथा ६.४ किलोमीटर् भूपृष्ठीयाः सुरङ्गाः सन्ति। अस्यां परियोजनायां अष्टौ पर्वतीय-सुरङ्गाः सन्ति, तासु सप्त महाराष्ट्रे (प्रायः ६.०५ किलोमीटर्) तथा एका ३५० मीटर् दीर्घा सुरङ्गा गुजरात-प्रदेशे स्थिताऽस्ति।
रेलमन्त्री अश्विनीवैष्णवः अवदत्— “अस्यां परियोजनायाम् आहत्य द्वादश स्थानकानि भविष्यन्ति। तेषु मुम्बई (बी.के.सी.), ठाणे, विरार्, बोईसर्, वापी, बिलीमोरा, सुरत्, भरूच्, वडोदरा, आणन्द्, अहमदाबाद् तथा साबरमती समाविष्टानि सन्ति। साबरमती अहमदाबाद-क्षेत्रस्य अन्तिम-स्थानकं भविष्यति, मुम्बई-नगरे च बी.के.सी. टर्मिनल् भविष्यति। सामान्यतः ५०८ किलोमीटर् दीर्घस्य मार्गस्य कृते द्वौ डिपो पर्याप्तौ स्याताम्, किन्तु पूर्ववर्ती-महाराष्ट्र-सरकारस्य काले अनुमतिषु विलम्बात् त्रयः डिपो निर्माणीयाः अभवन्।”
अश्विनीवैष्णवः अवदत्— “जापानी-प्रविध्याधारितं एतत् बुलेट्-रेल-यानं ३२० किलोमीटर् प्रतिघण्टा वेगेन धाविष्यति, मुम्बईतः अहमदाबाद् पर्यन्तं यात्राकालं वर्तमानस्य ७–८ घण्टाभ्यः न्यूनीकृत्य प्रायः १ घण्टा ५८ मिनिट् मध्ये समापयिष्यति। एषा परियोजना मध्यम-वर्गस्य कृते किफायती, आरामदायिनी तथा शीघ्र-यात्रायाः श्रेष्ठः विकल्पः भविष्यति।”
परियोजनायाः आर्थिक-पर्यावरणीय-लाभान् प्रकाशयन् रेलमन्त्री अवदत् यत् बुलेट्-रेल् मार्गपरिवहनेन तुलनायां प्रायः ९५ प्रतिशतं कार्बन-डाइ-ऑक्साइड् उत्सर्जनं न्यूनं करिष्यति। सः उक्तवान् यत् बहवः देशाः पर्यावरणीय-कारणैः बुलेट्-रेल्-परियोजनाः स्वीकृतवन्तः, भारतदेशेऽपि अस्याः दूरगामी आर्थिक-लाभाः भविष्यन्ति। एषा परियोजना मार्ग-समीपे आर्थिक-क्रियाकलापान् वर्धयिष्यति, रोजगार-सृजनं करिष्यति तथा नूतन-औद्योगिक-आई.टी.-केन्द्र-विकासे सहायकाऽपि भविष्यति।
सः अवदत् यत् प्रधानमन्त्री नरेन्द्र मोदी सदा नवीन-कार्यपद्धतीनां स्वीकरणे, गुणवत्तायां तथा प्रविधौ नूतन-मानक-स्थापने बलं दत्तवान्। बुलेट्-रेल्-परियोजना तस्य दृष्टिकोणस्य प्रत्यक्षं उदाहरणम् अस्ति। रेलमन्त्री अवदत्— “अस्याः परियोजनायाः पूर्णतायै १५ अगस्त २०२७ लक्ष्यं निर्धारितम्। प्रथम-चरणे सुरत्–बिलीमोरा, ततः वापी–सुरत्, अनन्तरं वापी–अहमदाबाद्, ठाणे–अहमदाबाद् तथा अन्ते मुम्बई–अहमदाबाद् विभागाः क्रमशः प्रारम्भं करिष्यन्ति।”
---------------
हिन्दुस्थान समाचार