बरेली, ०३ जनवरी (हि.स.)।उत्तरप्रदेशस्य फरीदपुर-विधानसभा-क्षेत्रात् भाजपायाः विधायकस्य प्रो.डॉ.श्यामबिहारीलालस्य आकस्मिक-निधने शनिवासरे प्रातः मुख्यमन्त्री योगी आदित्यनाथः बरेली-जनपदे स्थितं तस्य आवासं शक्तिनगरं प्राप्य दिवंगत-विधायकस्य चित्रे पुष्पाणि अर्पयित्वा भावपूर्णां श्रद्धाञ्जलिम् अर्पितवान्। ततः सः शोकसन्तप्तैः परिजनैः सह मिलित्वा गभीरां संवेदनां व्यक्तवान् तथा विधायकस्य पत्नीं, पुत्रीं, पुत्रं च धैर्यवचनैः सान्त्वनां दत्तवान्।

वन-राज्यमन्त्री डॉ.अरुणकुमारः सक्सेना अवदत् यत् मुख्यमन्त्री प्रायः पञ्चदश-निमेषान् यावत् आवासे स्थितः आसीत्, अस्मिन् काले च दिवंगत-विधायकस्य सामाजिकं राजनीतिकं च योगदानं स्मृतवान्।

उल्लेखनीयं यत् शुक्रवासरे प्रो. डॉ.श्यामबिहारीलालः पशुधन-मन्त्री धर्मपालसिंहस्य सभायां भागं ग्रहीतुं सर्किट-हाउस-इत्यत्र आगतः आसीत्। सभानन्तरं भोजनकाले सहसा तस्य स्वास्थ्यं विक्षिप्तम् अभवत्। चिकित्सकैः हृदयाघातः निधनस्य कारणं निरूपितम्।

शनिवासरे अन्तिम-दर्शनार्थं सहस्रशः जनाः तस्य आवासं प्राप्तवन्तः। मध्याह्ने प्रायः द्वादशवादने तस्मात् स्थानात् अन्तिम-यात्रा निर्गता। फरीदपुर-नगरस्य स्टेशन-मार्ग-स्थित-श्मशान-भूमौ तस्य अन्त्येष्टिः करिष्यते। सुरक्षा-व्यवस्थायाः अन्तर्गतं आवासात् श्मशान-भूमिं यावत् विशालम् आरक्षीदलं तथा पीएसीदलं च आसीत्।

श्रद्धाञ्जलि-प्रदातृषु जलशक्ति-मन्त्री स्वतन्त्रदेवसिंहः, कैबिनेट्-मन्त्री धर्मपालसिंहः, संघटन-महामन्त्री धर्मपालसिंहः, ब्रज-क्षेत्रीय-अध्यक्षः दुर्गविजयसिंहः शाक्यः, मेयर-उमेशगौतमः इत्यादयः बहवः जनप्रतिनिधयः उपस्थिताः आसन्। अस्मिन् अवसरे नगरे यातायात-व्यवस्थायां अपि अस्थायी परिवर्तनं कृतम्।

हिन्दुस्थान समाचार / अंशु गुप्ता