मुम्बई, ०३ जनवरीमासः (हि.स.)।महाराष्ट्रस्य मुख्यमन्त्री देवेंद्र–फडणवीसः शनिवासरे सातारा–जनपदे अवदत् यत् नायगाव–नगरे स्थापयितुं नियोजितं क्रान्तिज्योतिः सावित्रीबाई–फुले–महाराज्ञ्या स्मारकं तस्याः महान् कार्य–योगदानं निरन्तरं स्मारयिष्यति। एतत् स्मारकं संघर्षस्य प्रेरणां प्रदास्यति एव, अपि च समाजे विद्यमानायाः असमानतायाः विरुद्धं क्रान्तेः बीजानि अपि रोपयिष्यति।

मुख्यमन्त्रिणा उक्तं यत् नारीणाम् अधिकार–प्रदानाय तथा तासां सशक्तीकरणाय अत्र स्थापयितव्ये महिला–प्रशिक्षण–केन्द्रे सर्वविध–आवश्यक–प्रशिक्षण–व्यवस्था सुनिश्चिता भविष्यति। सः सातारा–जनपदे नायगाव–नगरे आयोजिता क्रान्तिज्योतिः सावित्रीबाई–फुले–महाराज्ञ्या १९५ तमी जयंती–समारोहं सम्बोधयन् एतानि विचाराणि अवदत्।

अस्मिन् एव अवसरे १४३ कोटि–रूप्यक–व्यये निर्मीयमाणस्य सावित्रीबाई–फुले–स्मारकस्य तथा महिला–प्रशिक्षण–केन्द्रस्य भूमिपूजन–संस्कारः सम्पन्नः। मुख्यमन्त्री फडणवीसः अवदत् यत् महाराष्ट्रे तथा सम्पूर्णे राष्ट्रे नारी–शिक्षायाः प्रवर्तिका, स्त्रीणां दास्य–बन्धनात् विमोचिका च या क्रान्तिज्योतिः सावित्रीबाई–फुले, तस्याः स्मारकं सर्वेषां कृते प्रेरणास्रोतः भविष्यति।

महात्मा–ज्योतिराव–फुले तथा सावित्रीबाई–फुले इत्येताभ्यां समाजे व्याप्तानां कुरीतीनां विरुद्धं क्रान्तेः शङ्खनादः कृतः तथा समतामूलक–समाज–स्थापनाय सुदृढा व्यवस्था निर्मिता। मुख्यमन्त्रिणा अपि उक्तं यत् रूढिवादः, असमानता, जातिवादः च सामाजिक–आर्थिक–दास्यस्य कारणानि सन्ति। तस्मिन् काले नारीणां शिक्षाधिकारः नासीत्, विधवानां च सम्पत्ति–अधिकारः न प्राप्यते स्म। एतादृशीषु परिस्थितिषु सावित्रीबाई–फुले समाजस्य प्रथां प्रति विद्रोहं कृत्वा बालिकानां कृते प्रथम–विद्यालयस्य स्थापना कृत्वा नारीणां शिक्षाधिकारं सुनिश्चितवती।मुख्यमन्त्री फडणवीसः अवदत् यत् अद्य शासनं महात्मा–फुले–सावित्रीबाई–फुले–इत्यनयोः मार्गेणैव सञ्चालितम् अस्ति। ‘लाडकी–बहन’–योजनाया अन्तर्गतं भगिनीनां ‘लक्षपति–भगानी’–रूपेण सशक्तीकरणस्य निर्णयानुसारम् इदानीं यावत् ५० लक्ष महिलाः लक्षपति–दीदी इति रूपेण परिवर्तिताः सन्ति, अस्मिन् वर्षे च एषा संख्या १ कोटि–पर्यन्तं प्राप्स्यति इति सः विश्वासं प्रकटितवान्। सातारा–जनपदे सार्धैक–लक्ष–लक्षपति–भगिनीनां निर्माणे सः विशेषं हर्षं व्यक्तवान्।

तथैव सः अवदत् यत् अरन–नगरे स्थितं सन्त–सावता–माली–स्मारकमपि भव्यं दिव्यं च भविष्यति, तस्य कृते आवश्यकाः व्यवस्थाः अपि क्रियमाणाः सन्ति।

अस्मिन् कार्यक्रमे विधान–परिषदः सभापतिः प्रो.राम–शिन्दे, खाद्य–नागरिक–आपूर्ति–मन्त्री छगन–भुजबलः, पालक–मन्त्री शम्भूराज–देसाई, ग्राम–विकास–मन्त्री जयकुमार–गोरे, आपत्–राहत–पुनर्वसन–मन्त्री मकरन्द–पाटीलः, राज्य–महिला–आयोगस्य अध्यक्षा रुपाली–चाकणकरा, विधायकाः डॉ.अतुल–भोसले, मनोज–घोरपडे, सचिन–पाटीलः, ग्राम–विकास–विभागस्य प्रधान–सचिवः एकनाथ–डवले, नायगाव–ग्रामस्य सरपञ्चा स्वाती–जमदाडे इत्यादयः अन्ये गणमान्याश्च उपस्थिताः आसन्।

हिन्दुस्थान समाचार / अंशु गुप्ता