नवदिल्ली, ०८ जनवरीमासः (हि.स.)। कांग्रेस–दलेन स्वच्छता–सर्वेक्षणे तथा “हर–घर–जल–योजना”–विषये प्रश्नाः उत्थापिताः।कांग्रेस–पत्रकार–विभागस्य प्रमुखः पवन–खेडा–महाभागः मध्यप्रदेशस्य इन्दौर–जनपदे भागीरथपुरा–क्षेत्रे दूषित–जल–पानात् अष्टादशाधिक–जनानां मृत्युम् उद्दिश्य सर्वकारस्य स्वच्छता–सर्वेक्षणं तथा “हर–घर–जल–योजना” च प्रश्नांकितवान्। सः अवदत् यत् इन्दौर–नगरं निरन्तरं नववारं स्वच्छता–सर्वेक्षणे प्रथम–स्थाने स्थितम् आसीत्, किन्तु एषा घटना स्वच्छ–भारत–अभियानस्य तथा हर–घर–जल–योजनायाः वास्तविक–स्थितिं प्रकाशयति।खेडा–महाभागः गुरुवासरे कांग्रेस–मुख्यालये आयोजितायां पत्रकार–वार्तायाम् अवदत् यत् इन्दौर–नगरे जल–पाइप–परिवर्तनस्य ठेका २२ जुलाई २०२२ तमे दिने एव अनुमोदितः आसीत्, किन्तु तस्मिन् कार्ये अद्यावधि प्रगतिर्न जाताभूत्।कांग्रेस–नेता अवदत् यत् गुजरातस्य गाँधीनगर–नगरे टाइफाइड–रोग–प्रकरणेषु शीघ्रं वृद्धिः दृश्यते, किन्तु अस्य विषये कश्चन चर्चां न करोति। सः दिल्ली–नगरे जल–प्रदूषणस्य अपि उल्लेखं कृत्वा अवदत् यत् यदा आम–आदमी–दलस्य सर्वकारः आसीत् तदा जलं कृष्णवर्णम् आसीत्, अद्य तु वर्तमान–सर्वकारे जलं पीतवर्णं जातम्।खेड़ा–महाभागः “इंटरनेशनल–सेण्टर–फॉर–सस्टेनेबिलिटी”–संस्थायाः प्रतिवेदनम् उद्धृत्य अवदत् यत् भारतस्य सप्ततिः प्रतिशतं जलं दूषितं जातम्। तथापि भारतीय–जनता–दलस्य सर्वकारः जनानां ध्यानं वास्तविक–विषयेभ्यः विचलयितुं प्रयत्नं करोति। हर–घर–जल–योजनायै सहस्रकोटि–रूप्यकाणि व्ययीकृतानि, किन्तु एषा योजना “हर–घर–जल–योजना” न, अपि तु “हर–घर–मल–योजना” इव सिद्धा जाता।कांग्रेस–नेता आरोपं कृतवान् यत् जनानां गृहेषु यत् जलं प्राप्यते, तस्मिन् मल–मिश्रणम् अस्ति, अस्य च उत्तरदायित्वं प्रत्यक्षतया सर्वकारस्य एव अस्ति। अस्यै परियोजनायै एशियन–डेवलपमेण्ट–धनागार–संस्थातः धनराशिः अपि आगता, किन्तु सा धनराशिः अन्ततः कुत्र गता इति प्रश्नः अद्यापि अनुत्तरितः अस्ति।

हिन्दुस्थान समाचार / अंशु गुप्ता