Enter your Email Address to subscribe to our newsletters
– हरसिद्धि-घट्टे षट्पञ्चाशद्भोगाः समर्पिताः, साधु-सन्तैः श्रद्धालुभिश्च प्रसादः उपभुक्तः
उज्जैननगरम्, १९ फरवरीमासः (हि.स.)। मध्यप्रदेशस्य उज्जैन-नगरे विश्वविख्याते ज्योतिर्लिङ्गे महाकालेश्वर-मन्दिरे महाशिवरात्रि-पर्वणि भगवतः शिवस्य माता-पार्वत्या सह विवाहानन्तरं नगरे स्वागत-समारोहाणां (रिसेप्शन) क्रमः आरब्धः।
बुधवासरस्य रात्रौ महाकाल-शयन-आरर्तिक्यानन्तरं श्री-महाकाल-शयन-आरार्ति-युवा-परिवारः हरसिद्धि-घट्ट-समीपे, हरसिद्धि-मन्दिरस्य पृष्ठभागे स्थिते नर्सिङ्घट्टे विशालं भण्डारं आयोजयत्। अस्मिन् अवसरे भगवते षट्पञ्चाशत्-प्रकारकः भोगः समर्पितः, यं बहुसंख्यकाः साधवः सन्तश्च श्रद्धालवश्च प्रसादरूपेण उपभुक्तवन्तः।
उल्लेखनीयं यत् मङ्गलवासरस्य रात्रौ ज्योतिर्लिङ्ग-भगवतः महाकालेश्वरस्य चन्द्र-दर्शनं तथा श्री-शिव-पञ्चानन-पञ्चमुखौटा-दर्शन-शृङ्गारः सम्पन्नः। एतेन सह महाकाल-मन्दिरे प्रचलितस्य महाशिवरात्रि-महोत्सवस्य समापनं जातम्। महाशिवरात्रि-पर्वानन्तरं उज्जैन-नगरे भगवतः शिवस्य माता-पार्वत्या सह विवाहसम्बद्धाः परम्पराः श्रद्धया उल्लासेन च आचर्यन्ते।
एवमेव बुधवासरस्य रात्रौ भव्यं भण्डार-आयोजनं कृतम्, यत् प्रतीकात्मकतया शिवस्य स्वागत-समारोह-रूपेण प्रस्तुतम्। स्वागत-स्थले विशालाः आदियोगी तथा बालाजी-प्रतिमाः, मनोहरश्च सज्जा-विन्यासः जनानां विशेषाकर्षणस्य केन्द्रं अभवत्।
अस्यैव क्रमस्य अन्तर्गतं शिवस्य विवाह-पत्रिकाः अपि वितरिताः। आयोजकैः सूचितं यत् श्री-महाकाल-शयन-आरार्ति-युवा-शक्ति-परिवारेण अग्रिमे प्रथम-मार्च-मासे भण्डाररूपेण अन्यः अपि भव्यः स्वागत-समारोहः आयोजयिष्यते। एतत् आयोजनं केवलं धार्मिक-श्रद्धायाः प्रतीकं न, अपि तु सामाजिक-समरसतायाः सेवा-भावस्य च द्योतकं वर्तते, यस्मिन् सर्ववर्गीयाः जनाः एकत्र समागत्य प्रसादं ग्रहीष्यन्ति।
हिन्दुस्थान समाचार / अंशु गुप्ता