Enter your Email Address to subscribe to our newsletters
गंगटोकम्, 21 फरवरीमासः (हि.स.)। प्रेम सिंह तमांग सिक्किमराज्यस्य मुख्यमन्त्री नूतनदिल्ली-नगरे आयोजिते एआई-शिखर-सम्मेलने काङ्ग्रेस-पक्षस्य युवा-विभागेन कृतस्य विरोध-प्रदर्शनस्य तीव्रां निन्दां कृतवान्। सः उक्तवान् यत् भारतस्य वैश्विक-प्रतिमां मलिनीकर्तुं काङ्ग्रेस-पक्षस्य प्रयत्नाः अस्वीकार्याः सन्ति।
मुख्यमन्त्री तमांग शनिवासरे फेसबुक् इति सामाजिक-माध्यमे लिखिते सन्देशे अवदत् यत् अस्मिन् महत्त्वपूर्णे समये, यदा भारतं नूतनदिल्ली-नगरे प्रतिष्ठितम् एआई-शिखर-सम्मेलनम् आयोजयति तथा विश्वे नवाचार-प्रविधि-क्षेत्रयोः शीघ्रवर्धमान-उपलब्धीः प्रदर्शयति, तदा काङ्ग्रेस-पक्षस्य एतादृशाः क्रियाः निन्दनीयाः सन्ति।
तेन उक्तं यत् यदा राष्ट्रं स्वं वैश्विक-प्रविधि-नेतृत्वे दृढीकर्तुं प्रयतते, तादृशाः व्यवधानाः अस्माकं विश्वसनीयतायाः विषये प्रश्नान् जनयितुं शक्नुवन्ति। सः अपि अवदत् यद्यपि राजनैतिक-विरोधः लोकतन्त्रस्य एकः महत्त्वपूर्णः स्तम्भः अस्ति, तथापि भारतस्य वैश्विक-छविं नाशयितुं काङ्ग्रेस-पक्षस्य प्रयासाः न उत्तरदायिनः न च ग्राह्याः मन्यन्ते।
मुख्यमन्त्री तमांग उक्तवान् यत् यदा भारतस्य प्रगति: वैश्विक-मञ्चे प्रदर्श्यते, तदा राष्ट्रहितं सर्वदा दलगत-राजनीत्याः उपरि स्थापनीयम्।
उल्लेखनीयम् यत् राष्ट्रिय-राजधानीस्थिते भारत-मण्डपम्-स्थले आयोजिते एआई-शिखर-सम्मेलने काङ्ग्रेस-युवा-विभागस्य कार्यकर्तारः आकस्मिकरूपेण प्रविश्य वस्त्र-त्यागपूर्वकं विरोध-प्रदर्शनम् अकुर्वन्। अस्याः घटनायाः कारणेन समग्रदेशे काङ्ग्रेस-पक्षस्य तीव्रा आलोचना प्रचलति।--------------------
हिन्दुस्थान समाचार