Enter your Email Address to subscribe to our newsletters
श्री–जगन्नाथ–आध्यात्मिक–केन्द्रं सामाजिक–सांस्कृतिक–संवादस्य प्रमुखं केन्द्रं भविष्यति : राष्ट्रपति:
पूर्वी–सिंहभूम–जनपदः, २६ फरवरीमासः (हि.स.) राष्ट्रपति-द्रौपदी-मुर्मु गुरुवासरे जमशेदपुर–नगरे कदमा–स्थिते मरीन–ड्राइव–क्षेत्रे श्री–जगन्नाथ–आध्यात्मिक–सांस्कृतिक–केन्द्रस्य निर्माणार्थं आधारशिलां स्थापितवती। वैदिक–मन्त्र–उच्चारणेन पारम्परिकै: विधिभि: च सह आयोजितं भूमिपूजन–समारोहं गरिमामय–रूपेण सम्पन्नम्।
अस्मिन् अवसरे राष्ट्रपति-द्रौपदी-मुर्मु अवदत्— भारतस्य सांस्कृतिक–परम्परा केवलं आस्थाया: विषयः न, अपि तु अस्माकं जीवन–पद्धतेः तथा सामाजिक–समरसताया: आधारशिला अस्ति। श्री–जगन्नाथ–परम्परा लोक–कल्याणस्य, सेवायाः तथा समावेशितायाः सन्देशं ददाति इति तया प्रतिपादितम्।
तादृशानि आध्यात्मिक–सांस्कृतिक–केन्द्राणि समाजस्य संयोजनाय, नूतन–वंशं स्व–मूलैः सह परिचायितुं, मानवीय–मूल्यानां सुदृढीकरणाय च महत्त्वपूर्णां भूमिकां वहन्ति इति सा अवदत्। राष्ट्रपति: विश्वासं व्यक्तवती यत् एतत् केन्द्रं न केवलं धार्मिक–क्रियाकलापानां स्थलम् भविष्यति, अपि तु सामाजिक–शैक्षणिक–सांस्कृतिक–संवादस्य अपि प्रमुखं केन्द्रं भविष्यति।
कार्यक्रमे राज्यपालः संतोष-कुमार-गंगवार:, मुख्यमन्त्री हेमन्त: सोरेन:, केन्द्रीय–मन्त्री धर्मेंद्रप्रधान:, सांसदः बिद्युतबरन-महतो, विधायकौ सरयू राय: तथा पूर्णिमा साहू इत्येतै: सह अनेके गणमान्याः उपस्थिताः आसन्।
हिन्दुस्थान समाचार / अंशु गुप्ता