Enter your Email Address to subscribe to our newsletters
नव दिल्ली, 27 फ़रवरी मासः(हि.स.)।
भारतीय-क्रिकेट-दलस्य बल्लेबाजः रिंकू सिंह इत्यस्य पितुः खचन्द्रसिंहस्य अद्य प्रातः प्रायः ४:३६ वादने चतुर्थ-अवस्थायाः यकृत-कर्कटरोगस्य दीर्घ-संघर्षानन्तरं निधनम् अभवत्। सः यथार्थ अस्पताल इत्यस्मिन् चिकित्सालये अन्तिमं श्वासम् अकरोत्, यत्र अतीतानि कतिपयानि दिनानि तस्य स्वास्थ्यं अतीव संकटपूर्णम् आसीत् तथा उपचारः प्रवर्तते स्म।
कुटुम्बीयानां कथनानुसारं खचन्द्रसिंहः वेंटिलेटर-समर्थने आसीत्, तस्य स्थितेः स्थिरीकरणाय चिकित्सकैः निरन्तरं वृक्क-चिकित्सा अपि दीयते स्म। गहन-चिकित्सायाः अनन्तरम् अपि तस्य स्वास्थ्ये शीघ्रं अवनतिः अभवत्, अन्ततः तस्य देहावसानं जातम्।
एषा दुःखद-घटना तस्मिन् समये अभवत् यदा रिंकू-सिंहः भारतीय-दलेन सह टी२०-विश्वकप-क्रीडायां संलग्नः आसीत्। जिम्बाब्वे-देशस्य विरुद्धं सुपर-८ स्पर्धायाः पूर्वं यदा तस्य पितुः अवस्था अधिकं बिगडिता, तदा सः स्वगृहं प्रत्यागच्छत्। अनन्तरं सः पुनः चेन्नई नगरे दलेन सह संयुतः अभवत्। किन्तु पितुः निधनानन्तरं पुनः स्वगृहं प्रतिनिवृत्तः अस्ति।
जिम्बाब्वे-विरुद्धे स्पर्धायां रिंकू-सिंहः अन्तिम-एकादशे न आसीत्। दल-संयोजने परिवर्तनं कृत्वा संजू सैमसन तथा अक्षर पटेल समाविष्टौ। संजू-सैमसनः शीर्ष-क्रमे अवसरं प्राप्तवान्, ईशान-किशनः अधः-क्रमे प्रेषितः, तिलक-वर्मा च समाप्तिकारक-भूमिकायां नियुक्तः। तथापि रिंकू-सिंहः स्थानापन्न-खिलाडी-रूपेण क्षेत्रे दलस्य सह स्थितः आसीत्।
अद्यावधि स्पर्धायां रिंकू-सिंहः पञ्च स्पर्धाः अकरोत्, यत्र तेन २४ धावनाः कृताः, तथा समाप्तिकारक-रूपेण स्वीयां भूमिकां निर्वहितवान्।
अधुना भारत-दलस्य कोलकाता नगरे वेस्टइण्डीज-दलस्य विरुद्धं महत्त्वपूर्णा स्पर्धा भविष्यति, या प्रायः अपसारण-स्पर्धा इव अस्ति। अतः रिंकू-सिंहस्य उपलब्धतायाः विषये सन्देहः वर्तते। भारतीय-क्रिकेट-परिषदः वा दल-प्रबन्धनस्य पक्षात् अद्यापि किमपि आधिकारिक-वक्तव्यं न प्रकाशितम्।
यदा भारतीय-दलः महत्त्वपूर्ण-स्पर्धायाः सज्जतां करोति, तदा सहखिलाडिनः अस्मिन् कठिन-समये तस्य साहाय्याय स्थिताः सन्ति।
पूर्व-भारतीय-क्रिकेट-खिलाडी हरभजन सिंह अपि शोकं व्यक्तवान्—
“श्री-खचन्द्रसिंहस्य निधन-समाचारं श्रुत्वा अतीव दुःखम् अनुभूतम्। टी२०-विश्वकप-कालस्य मध्ये रिंकू-सिंहस्य कुटुम्बस्य च एषः समयः अतीव कठिनः अस्ति। मम संवेदनाः तेषां सह सन्ति। वाहेगुरुः दिवंगत-आत्मनः शान्तिं ददातु, शोक-संतप्त-कुटुम्बाय च धैर्यं प्रददातु।”
रिंकू-सिंहस्य अस्मिन् निजी-शोके सम्पूर्णं क्रिकेट-जगत् तस्य सह स्थितं सन्तापं प्रकटयति।
---------------
हिन्दुस्थान समाचार