Enter your Email Address to subscribe to our newsletters
नलबारी (असमः), 11 मार्चमासः (हि.स.)। असम-राज्ये आगामिनः विधानसभानिर्वाचनस्य दिवसाः यथा यथा समीपं आगच्छन्ति तथा तथा निर्वाचनक्षेत्रानुसारं राजनैतिकचञ्चलता अपि आरभ्यते। असम-विधानसभानिर्वाचनस्य तिथीनां घोषणा अद्यापि न कृता, तथापि राजनैतिकदलानि पूर्वमेव स्वीयाः सिद्धताः आरब्धवन्ति। ३९ सङ्ख्यकस्य नलबारी-विधानसभा-निर्वाचनक्षेत्रे अपि निर्वाचनस्य वातावरणं दृश्यते। नलबारी-आसनात् काङ्ग्रेस्-दलेन अशोककुमारशर्मा नामकः प्रत्याशी घोषितः अस्ति, किन्तु सत्तारूढेन भारतीयजनतापार्टी-दलेन अद्यापि कश्चन प्रत्याशी घोषितः नास्ति।असम-विधानसभायाः महत्त्वपूर्णेषु निर्वाचनक्षेत्रेषु एकं क्षेत्रं नलबारी इति प्रसिद्धम्। अस्य क्षेत्रस्य प्रतिनिधित्वं वर्तमानकाले असम-शासनस्य प्रभावशाली मन्त्री जयन्त मल्लबरुवा कुर्वन्ति। तस्मात् पूर्वं जयन्तमल्लबरुवा वर्षे २०११ तमे प्रथमवारं काङ्ग्रेस्-दलस्य प्रत्याशिरूपेण अत्र क्षेत्रे विधायकत्वेन निर्वाचितः आसीत्। अनन्तरं वर्षे २०२१ तमे भाजपा-गठबन्धनस्य समर्थनात् पुनः विजयम् प्राप्य विधायकात् मन्त्रिपदं प्राप्तवान्।
सामान्य-मतदातृणां मतानुसारं नलबारी-क्षेत्रे गतपञ्चवर्षेषु पर्याप्तः विकासः जातः। केचन मतदातारः अपि मन्यन्ते यत् मन्त्री जयन्तमल्लबरुवस्य कार्यकाले नलबारी-क्षेत्रे सर्वाङ्गीणः विकासः अभवत्।
नलबारी-विधानसभाक्षेत्रे नूतन-स्टेडियम्, नूतनं संयुक्त-जिलाधिकारी-कार्यालयम्, द्वौ उड्डयन-सेतू (फ्लायओवर्), नगरस्य मार्गाः चतुष्पथाः, मार्गदीपाः, सम्मेलन-केन्द्रं च इत्यादीनां विकासकार्येषु जयन्तमल्लबरुवस्य प्रयासाः केषाञ्चन मतदातृभिः प्रशंसिताः। तथापि केचन कार्याणि अद्यापि अवशिष्टानि सन्ति, येषां पूर्तिः आगामिनि कार्यकाले भविष्यतीति मतदातारः आशां व्यक्तवन्तः।
अन्यतः केचन जनाः अस्मिन् निर्वाचनक्षेत्रे विपक्षस्य दुर्बलतां विषये चिन्तां प्रकटितवन्तः। जनाः अवदन् यत् सत्तारूढा भारतीयजनतापार्टी नलबारी-निर्वाचनक्षेत्रे पूर्णवेगेन विकासप्रयत्नान् कृतवती। अस्य कारणात् नलबारी-क्षेत्रे सत्तारूढा भाजपा दृढस्थितौ अस्ति इति मन्यते। गठबन्धनस्य प्रत्याशिरूपेण वर्तमानः विधायकः मन्त्री च जयन्त मल्लबरुवा पुनः असम-विधानसभायां निर्वाचितः भविष्यतीति सम्भावना अपि सामान्य-मतदातृभिः व्यक्ता।
उल्लेखनीयं यत् अस्मिन् निर्वाचने काङ्ग्रेस्-दलेन पूर्व-भाजपा-विधायकाय अशोककुमारशर्मणे टिकट् प्रदत्तम्। पूर्वविधायकः अशोककुमारशर्मा २०२४ वर्षस्य अगस्तमासस्य द्वितीये दिने भारतीयजनतादलं परित्यक्तवान्। भाजपादलेन अपमानितः अस्मि इति आरोपं कृत्वा सः त्यागपत्रं समर्पितवान्। अशोकशर्मा वर्षे २०१६ तमे विधानसभानिर्वाचने भाजपादलस्य प्रत्याशिरूपेण विजयी अभवत्। अतः अस्मिन् निर्वाचने भाजपा-काङ्ग्रेस्-दलयोः मध्ये प्रत्यक्षस्पर्धा भविष्यतीति मन्यते।------------------
हिन्दुस्थान समाचार