नवदिल्ली, ११ मार्चमासः (हि.स.)।राष्ट्रीय–स्वयंसेवक–संघस्य (आरएसएस) प्रतिवर्षं आयोज्यमाना त्रिदिवसीया अखिलभारतीय–प्रतिनिधि–सभा अस्मिन् वर्षे १३ मार्चमासतः १५ मार्चमासपर्यन्तं हरियाणा–राज्यस्य समालखा–नगरे आयोज्यते। अस्यां सभायां सहभागितार्थं संघस्य प्रमुख–पदाधिकारिणः अत्र आगतवन्तः सन्ति।

प्रतिनिधि–सभाया: आरम्भात् पूर्वं संघस्य अखिलभारतीय–प्रचार–प्रमुखः सुनील–आम्बेकरः पत्रकार–सम्मेलने अस्य विषये संक्षिप्त–सूचनां दत्तवान्। अस्मिन् अवसरे उत्तर–क्षेत्रस्य संघचालकः पवन–जिन्दलः अपि तेन सह उपस्थितः आसीत्।

सुनील–आम्बेकरः अवदत् यत् प्रतिनिधि–सभाया: सभा शुक्रवासरे प्रातः नववादनात् आरभ्य रविवासरस्य सायंकालपर्यन्तं प्रचलिता भविष्यति। अस्मिन् अवधौ बहूनि सत्राणि आयोजयिष्यन्ते। प्रथम–सत्रे संघस्य सरकार्यवाहः दत्तात्रेय–होसबाले गतवर्षस्य संघ–कार्यसम्बद्धं प्रतिवेदनं प्रस्तूय सभाया: अनुमतिं याचिष्यते।

अस्यां सभायां संघ–परिवारस्य विभिन्न–संघटनानां यथा मजदूर–संघः, विश्व–हिन्दू–परिषद्, भारतीय–जनता–पक्षः, राष्ट्रीय–सेविका–समितिः तथा अन्यैः सह आहत्य ३२ संघटनानां पदाधिकारिणः अपि सहभागितां करिष्यन्ति।

प्रचार–प्रमुखेन उक्तं यत् गत–एकवर्षे संघस्य शताब्दी–वर्षस्य निमित्तेन गृह–सम्पर्कः तथा हिन्दू–सम्मेलनम् इत्यादयः बहवः कार्यक्रमाः आयोजिताः। एतेषां कार्यक्रमाणां माध्यमेन देशे प्रायः १० कोटि अधिकेषु गृहेषु सम्पर्कः स्थापितः। तेन अपि उक्तं यत् अस्मिन् अवधौ संघस्य प्रायः ६ सहस्राणि नूतन–शाखाः अपि वर्धिताः।

तेन उक्तं यत् एक–फरवरीमासे सन्त–रविदासस्य ६५०–तमः जयन्ती–उत्सवः आसीत्। अस्याः उपलक्ष्ये वर्षपर्यन्तं विविधाः कार्यक्रमाः समाजेन सह आयोज्यन्ते। तथा च शताब्दी–वर्षस्य निमित्तेन बृहद्–स्तरे कार्यक्रमाः आयोजिताः, यस्य परिणामस्वरूपं ‘जॉइन–आरएसएस’ इति माध्यमेन संघेन सह सम्बद्धानां जनानां सङ्ख्या वर्धिता। गतवर्षे जनवरी–फरवरी–मासयोः १६,१९२ आवेदनानि प्राप्तानि आसन्, किन्तु अस्मिन् वर्षे २६,४४५ आवेदनानि प्राप्तानि भवन्ति। तथैव स्वयंसेवकानां शिक्षणार्थं अस्मिन् वर्षे ९७ शिक्षण–वर्गाः आयोज्यन्ते। तेषु ७३ वर्गाः ४० वर्षात् न्यून–वयसः स्वयंसेवकानां कृते सन्ति, तथा २५ वर्गाः ४० वर्षात् ६५ वर्षपर्यन्त–वयसां स्वयंसेवकानां कृते सन्ति।

सभाया: समाप्तौ संघस्य सरकार्यवाहः दत्तात्रेय–होसबाले सभासम्बद्धेषु विषयेषु पत्रकार–सम्मेलनं सम्बोधयिष्यति।

हिन्दुस्थान समाचार / अंशु गुप्ता