मेदिनीपुरम्, ११ मार्चमासः (हि.स.)।पश्चिम–मेदिनीपुर–जनपदे भारतीय–जनता–पक्षस्य ‘परिवर्तन–संकल्प–यात्रा’-विषये सत्तारूढ–तृणमूल–कांग्रेस–दलस्य प्रमुख–विपक्ष–दलेन भाजपापक्षेण सह राजनैतिक–उग्रता अत्यन्तं तीव्रा जाता। जनपदस्य विभिन्नेषु क्षेत्रेषु निर्गच्छन्ती एषा यात्रा अग्रिम–निर्वाचनात् पूर्वं राजनैतिक–तापमानम् अधिकं वर्धितवती। भाजपापक्षः एतां यात्रां जनसमर्थनस्य प्रतीकम् इति वदति, तृणमूल–कांग्रेसपक्षः तु एतां पूर्णतया विफलां घोषितुं प्रयतते।

परिवर्तन–यात्रायाः माध्यमेन भाजपा स्वस्य सांघटनिक–शक्तिं दृढीकर्तुं प्रयासं करोति। रथ–परिक्रमायाः जनसभानां च अस्मिन् क्रममध्ये केन्द्रीय–मन्त्री गिरिराज–सिंहः, विधानसभायां प्रतिपक्ष–नेता शुभेन्दु–अधिकारी, प्रदेश–अध्यक्षः शमिक–भट्टाचार्यः तथा राहुल–सिन्हा इत्यादयः प्रमुख–नेतारः घोषणां कुर्वन्ति। अस्यां श्रेण्यां कुर्मी–समाजस्य प्रभावशाली–नेता राजेश–महतो इत्यस्य भाजपायां प्रवेशः क्षेत्रस्य जातीय–समीकरणस्य दृष्ट्या महत्त्वपूर्णः मन्यते।जनसभासु भाजपा–नेतारः बहूनि लोक–आकर्षक–वचनानि अपि घोषितवन्तः। तेषु ‘लक्ष्मी–भण्डार’–योजनायाः राशेः त्रिसहस्र–रूप्यक–पर्यन्तं वृद्धिः, कृषकान् प्रति वार्षिकम् अष्टादश–सहस्र–रूप्यकाणां सहायता तथा भ्रष्टाचार–रहित–शिक्षक–नियुक्तिः इत्यादयः संकल्पाः सम्मिलिताः सन्ति।

अन्यतः तृणमूल–कांग्रेस–पक्षः भाजपायाः एतेषां वचनानां तीव्रं खण्डनं कृतवान्। दलस्य अभिप्रायः अस्ति यत् भाजपायाः सभासु अपेक्षितः जनसमूहः न दृश्यते, यत् एतां यात्रां प्रति बङ्गाल–जनतायाः अस्वीकारस्य प्रमाणम् अस्ति। आरक्षक–प्रतिवेदनानां उल्लेखं कृत्वा तृणमूल–नेतारः उक्तवन्तः यत् अधिकांशेषु कार्यक्रमेषु उपस्थितिः अत्यल्पा आसीत्।

भाजपा–नेतृत्वस्य तु कथनम् अस्ति यत् अस्याः यात्रायाः मुख्यम् उद्देश्यं केवलं शक्ति–प्रदर्शनं न, अपि तु बूथ–स्तरस्य कार्यकर्तॄणां पुनर्जीवनम् अस्ति। नारायणगढ–क्षेत्रस्य नेतारौ गौरिशंकर–अधिकारी अरूप–दासः च अवदताम् यत् ग्रामीण–क्षेत्रेषु कार्यकर्तृषु अस्याः यात्रायाः कारणेन नूतनः उत्साहः संचारितः, तथा च जनाः रात्रौ अपि रथस्य आगमनस्य प्रतीक्षां कुर्वन्ति इति भू–स्थितेः प्रमाणम् अस्ति।

इदानीं प्रतिघात–रणनीत्याः अन्तर्गतं तृणमूल–कांग्रेस–दलस्य घाटाल–सांगठनिक–जनपद–अध्यक्षः अजीत–माइती भाजपां मतदातॄणाम् उपेक्षायाः आरोपं कृतवान्। भाजपायाः अस्याः यात्रायाः प्रत्युत्तररूपेण तृणमूल–दलेन अपि प्रत्युत्तरप्रदर्शनस्य आयोजनं कर्तुं निर्देशः दत्तः। अतः अग्रिमेषु दिनेषु जनपदे राजनैतिक–संघर्षस्य तीव्रता अधिका भविष्यतीति सम्भावना वर्तते। उभौ पक्षौ अस्याः यात्रायाः अवसरे ग्रामीण–क्षेत्रेषु स्वीयं परिचयं सुदृढीकर्तुं स्पर्धां कुरुतः।

हिन्दुस्थान समाचार / अंशु गुप्ता