कोलकाता, 12 मार्चमासः(हि.स.)। पश्चिमबङ्गराज्यस्य द्वाविंशतितमः राज्यपालरूपेण आर.एन. रवि गुरुवासरे शपथग्रहणं कृतवान्। शपथग्रहणसमारोहानन्तरं मुख्यमंत्री ममता बनर्जी तेन सह मिलित्वा उक्तवती यत् “बङ्गालः तान् एव प्रेम्णा स्वीकरोति ये बङ्गालं प्रेम्णा पश्यन्ति।”

समारोहानन्तरं मुख्यमंत्री नव-राज्यपालस्य स्वागतं कृत्वा तस्मै पारम्परिकम् अङ्गवस्त्रं समर्पितवती। तस्मिन् प्रसङ्गे सा एतद् अपि सन्देशं दत्तवती।

मुख्यमंत्री उक्तवती यत् बङ्गालप्रदेशः तथा बङ्गालीजनाः सर्वासां भाषापृष्ठभूमीनां जनानां सम्मानं कुर्वन्ति। अत्र सर्वे जनाः शान्तिपूर्वकं सह वसन्ति। किन्तु अत्यन्तं महत्त्वपूर्णं यत् बङ्गालः तान् एव प्रेम्णा स्वीकरोति ये बङ्गालं प्रेम्णा पश्यन्ति। एषा बङ्गालिजनानां विशेषता अस्ति।

एतस्मिन् विषये राज्यपालः आर.एन. रविः उक्तवान् यत् पश्चिमबङ्गप्रदेशः भारतस्य बौद्धिक-सांस्कृतिक-राजधानीरूपेण ख्यातः आसीत्।

राजनीतिकपर्यवेक्षकाः मन्यन्ते यत् मुख्यमंत्रीया कृतं एतत् वक्तव्यं नूतनराज्यपालाय सूक्ष्मः राजनैतिकसन्देशः अपि अस्ति। तेषां मतानुसारं राज्यसचिवालयस्य राजभवनस्य च मध्ये सौहार्दपूर्णाः सम्बन्धाः तदा एव सम्भवन्ति यदा राज्यहितानां वा राज्यसरकारस्य कार्याणां विरुद्धं किमपि कदम् न क्रियते।

उल्लेखनीयम् यत् तृणमूल कांग्रेस सरकारस्य कार्यकाले राजभवनस्य राज्यसरकारस्य च मध्ये संघर्षस्य इतिहासः अस्ति। एषा स्थितिः तदा आरब्धा यदा जगदीप धनखड़ राज्यपालः आसीत्, यः पश्चात् भारतस्य उपराष्ट्रपतिरभवत्। तदनन्तरं पूर्वराज्यपालस्य सी.वी. आनंद बोस कार्यकाले अपि एषा स्थिति निरन्तरा आसीत्।

नूतनराज्यपालः आर.एन. रविः पूर्वराज्यपालं सी.वी. आनन्दबोसस्य स्थानं गृहीतवान्। सः मार्चमासस्य पञ्चमे दिने सायंकाले आकस्मिकरूपेण स्वपदात् त्यागपत्रं दत्तवान्। तस्मिन् एव सायंकाले रविः तस्य उत्तराधिकारी इति घोषितः। रविः बुधवासरे कोलकातानगरं प्राप्तवान्, यदा बोसः स्वगृहराज्यं केरलं प्रति प्रत्यागतः।

अतीतेषु प्रायः पञ्चदशवर्षेषु रविः द्वितीयः सः पूर्व-गुप्तचर-विभागाध्यक्षः अस्ति यः पश्चिमबङ्गराज्यस्य राज्यपालः नियुक्तः। अस्मात् पूर्वं 2011 वर्षस्य विधानसभा-निर्वाचनात् पूर्वं पूर्व-गुप्तचर-विभागाध्यक्षः तथा पूर्व-राष्ट्रीय-सुरक्षा-सलाहकारः एम.के. नारायणन पश्चिमबङ्गस्य राज्यपालरूपेण नियुक्तः आसीत्।----------------------

हिन्दुस्थान समाचार