Enter your Email Address to subscribe to our newsletters
कोलकातानगरम्, १२ मार्चमासः (हि.स.)। पश्चिम–बङ्गाल–राज्यस्य नवनियुक्तः राज्यपालः आर.एन.रविः गुरुवासरे अत्र लोकभवनप्रासादे पदस्य गोपनीयतायाश्च शपथं गृहीतवान्। तस्मै कलकत्ता–उच्च–न्यायालयस्य मुख्य–न्यायाधीशः न्यायमूर्तिः सुजय–पालः शपथं दत्तवान्।
शपथ–ग्रहण–समारोहे मुख्यमन्त्री ममता–बनर्जी, मुख्य–सचिवा नन्दिनी–चक्रवर्ती, विधानसभा–अध्यक्षः बिमान–बनर्जी तथा वाम–मोर्चा–अध्यक्षः बिमान–बोसः इत्यादयः बहवः गणमान्य–व्यक्तयः उपस्थिताः आसन्।
शपथ–ग्रहण–समारोहः निर्धारित–समये पूर्वाह्णे ११:३० वादने आरब्धः। शपथ–ग्रहणात् पूर्वं तथा अनन्तरं “वन्दे मातरम्” इति राष्ट्र–गीतं तथा “जन–गण–मन” इति राष्ट्र–गानं प्रस्तुतम् अभवत्। शपथ–ग्रहणानन्तरं राज्यपालः मुख्यमन्त्रिणा अन्यैश्च अतिथिभिः सह औपचारिक–साक्षात्कारं कृतवान्।
उल्लेखनीयम् अस्ति यत् तत्कालीन–राज्यपालस्य सी.वी.आनन्द–बोसस्य त्यागपत्र–प्रदानानन्तरं आर.एन.रविः पश्चिम–बङ्गाल–राज्यस्य राज्यपाल–रूपेण नियुक्तः। अस्मात् पूर्वं सः तमिलनाडु–राज्यस्य राज्यपालः आसीत् तथा बुधवासरे एव कोलकाता–नगरं प्राप्तवान्।
तमिलनाडु–राज्यपाल–रूपेण स्व–कार्यकाले तस्य राज्य–सर्वकारेण सह कतिपयेषु विषयेषु मतभेदाः अपि प्रकटिताः आसन्। विविध–विधेयकानां विषये राज्य–सर्वकारस्य राजभवनस्य च मध्ये संघर्ष–स्थितिः अपि अभवत्।
पूर्व–राज्यपालस्य आनन्द–बोसस्य आकस्मिक–त्यागपत्र–प्रकरणे मुख्यमन्त्री ममता–बनर्जी प्रश्नान् उत्थाप्य अवदत् यत् तस्य त्यागपत्रस्य कारणानि तस्याः ज्ञाने न सन्ति, किन्तु विधानसभा–निर्वाचनात् पूर्वं वर्तमान–परिस्थितीन् दृष्ट्वा अस्मिन् घटनाक्रमे बहवः प्रश्नाः उत्पद्यन्ते।
हिन्दुस्थान समाचार / Dheeraj Maithani