लखनऊनगरम्, १३ मार्चमासः (हि.स.)। रक्षा–मन्त्री राजनाथ–सिंहः उक्तवान् यत् अद्य उत्तरप्रदेशः व्यापक–दृष्ट्या सह अग्रे गच्छति। गत-वर्षेषु वयं सर्वे दृष्टवन्तः यत् राज्येन सर्वेषु क्षेत्रेषु महत्त्वपूर्णा प्रगतिः प्राप्ता। अवसंरचना–निवेश–उद्योग–तथा–शिक्षा–इत्यादिषु सर्वेषु क्षेत्रेषु उत्तरप्रदेशः नूतनां गतिं प्राप्तवान्। मम विश्वासः अस्ति यत् एतेषां प्रयासानां कारणेन अग्रिमवर्षेषु उत्तरप्रदेशः शिक्षाक्षेत्रे अपि नूतनान् मानकान् स्थापयितुं समर्थः भविष्यति। अत्र स्थिताः शैक्षणिक–संस्थाः केवलं प्रदेशस्य एव न, अपितु समग्र–देशस्य छात्राणां कृते आकर्षण–केन्द्रं भविष्यन्ति।

केन्द्रीय–मन्त्री राजनाथ–सिंहः शुक्रवासरे लखनऊ–नगरे गोल्फ–सिटी–क्षेत्रे सिटी–मान्टेसरी–विद्यालयस्य नूतन–भवनस्य उद्घाटनानन्तरं जनान् सम्बोधयन् एतत् उक्तवान्। सः अवदत् यत् यदा कस्यचित् नगरस्य परिचयः तस्य मार्गैः भवनैः च अतिक्रम्य तस्य शैक्षणिक–सांस्कृतिक–संस्थानैः निर्मीयते, तदा तत् नगरं वस्तुतः समाजस्य भविष्यं आकारयति।

रक्षा–मन्त्री अवदत् यत् अद्य प्रदेशे केवलं विद्यालयानां महाविद्यालयानां च उद्घाटनमेव लक्ष्यीकृतं नास्ति, अपि तु तादृशस्य वातावरणस्य निर्माणाय प्रयासः क्रियते यस्मिन् बालकाः अध्ययनेन सह सकारात्मकं शिक्षण–पर्यावरणं अपि प्राप्नुयुः। तेन उक्तं यत् विद्यालयः केवलं ज्ञान–प्रदानस्य स्थानं न भवति, अपितु मानव–निर्माणस्य प्रयोगशाला अपि भवति। तत्र केवलं गणित–विज्ञान–भाषा–इत्यादय: विषया: एव न शिक्ष्यन्ते, अपितु जीवनस्य मूल्यानि अपि शिक्ष्यन्ते। अस्माभिः बालकानां शिक्षया सह तेषां व्यक्तित्व–विकासे अपि ध्यानं दातव्यम्।

राजनाथ–सिंहः अवदत् यत् शिक्षायाः वास्तविकं उद्देश्यम् अस्ति यत् मनुष्यः स्वज्ञानस्य उपयोगं केवलं स्वार्थाय न, अपितु समाजस्य प्रगत्यै अपि करोतु। बालकाः विद्यालये अवश्यं पठन्ति, किन्तु तेषां व्यक्तित्वं गृहे निर्मीयते। विद्यालयः तेभ्य: ज्ञानं अनुशासनं च ददाति, गृहं तु तेषां जीवनानुभवं संवेदनशीलतां संस्कारान् च ददाति। केवलं उत्तमा नियुक्तिः, उत्तमं पारिश्रमिकं वा प्रतिष्ठित–संस्थायां प्रवेशः एव जीवनस्य सम्पूर्णा सफलता न भवति। वास्तविक–सफलता तदा भवति यदा मनुष्यः स्वज्ञानैः स्वविचारैः च समाजे सकारात्मकं परिवर्तनं जनयितुं समर्थः भवति। अतः बालकान् केवलं अङ्क–प्राप्तये न, अपितु जीवनस्य समस्यासु सज्जाकरणम् आवश्यकम्।

हिन्दुस्थान समाचार / अंशु गुप्ता