फरीदाबादनगरम्, १४ मार्चमासः (हि.स.)। हरियाणा–राज्यस्य मन्त्रिमण्डल–मन्त्री विपुल–गोयलः नगर–निगम–फरीदाबादस्य पक्षतः सेक्टर–१२ स्थिते टाउन–पार्क इत्यत्र आयोजितस्य फ्लावर–फेस्टिवल–२०२६ इत्यस्य सूत्रं छित्त्वा उद्घाटनं कृतवान्। अस्मिन् अवसरे तेन सह नगर–निगम–महापौरः प्रवीण–बत्रा–जोशी तथा निगमायुक्तः धीरेन्द्र–खड्गटा अपि उपस्थितौ आस्ताम्।

शनिवासरे आयोजिते कार्यक्रमे विपुल–गोयलः नगर–निगम–फरीदाबादस्य अधिकारिणां जनप्रतिनिधीनां च प्रयासान् प्रशंसन् अवदत् यत् पूर्वकालात् टाउन–पार्क-इत्यत्र आयोजितः पुष्प-प्रदर्शिनी पुनरारब्धा इति प्रशंसनीयः प्रयत्नः अस्ति। अस्य कार्यक्रमस्य सफलतायां नगर–निगमस्य दलस्य, जनप्रतिनिधीनां तथा समाजस्य विविध–वर्गाणां महत्त्वपूर्णं योगदानम् अस्ति।

सः अवदत् यत् फरीदाबाद–निवासिनः केवलं विकासे एव न, अपितु नगरस्य सौन्दर्ये हरितिमायां च अपि सजगाः सन्ति। पुष्पप्रदर्शिनी–सदृशाः कार्यक्रमाः एतत् दर्शयन्ति यत् नागरिकाः स्व–नगरं स्वच्छं सुन्दरं आकर्षकं च कर्तुं सहभागितां कर्तुम् इच्छन्ति।

मन्त्रिणा पूर्वं कृतानां वृक्षारोपण–अभियानानां, टाउन–पार्क-इत्यस्य विकासस्य, इको–वन तथा नमो–वन इत्यादिनां निर्माणस्य, उद्यानानां सौन्दर्यीकरणस्य च उल्लेखः कृतः। सः अवदत् यत् अग्रिम–काले टाउन–पार्क-इत्यस्य कृते स्वीकृतैः विकास–कार्यैः महत्त्वपूर्णानि परिवर्तनानि द्रष्टुं शक्यन्ते। बालकानां कृते जल–नालिका (वाटर–कैनाल) तथा नौकायान–सौविध्यम् (बोटिंग) आरब्धुं योजना अपि अस्ति।

स्वच्छता–व्यवस्थायाः उन्नयनस्य विषये अपि सः अवदत् यत् कूटक–संग्रहण–प्रणाली, डोर–टू–डोर संग्रहणम्, यान्त्रिक–मानवीय–स्वच्छता–कार्याणि तथा रात्रिकालीन–मार्ग–स्वच्छता इत्यादयः व्यवस्थाः अधिकं सुदृढाः क्रियन्ते। अग्रिमेषु मासेषु नगरे महत्त्वपूर्णं परिवर्तनं दृश्यते इति सः विश्वासं व्यक्तवान्।

सः अवदत् यत् फरीदाबाद–नगरम् अन्ताराष्ट्रिय–स्तरस्य विकसित–नगरं कर्तुं सर्वकारेण विशेष–योजनाः निर्मिताः सन्ति। जेवर–विमानक्षेत्रेण सह संयोजकतया सह अनेकानि विकास–कार्याणि प्रस्तावितानि सन्ति।

मुख्यमन्त्रिणः प्रस्तावित–यात्रायाः विषये सः अवदत् यत् अग्रिमे ४ अप्रैलमासे प्रातः ११ वादने सेक्टर–१२ क्षेत्रे मुख्यमन्त्रिणः कार्यक्रमः निश्चितः अस्ति।

नगर–निगम–महापौरः प्रवीण–बत्रा–जोशी अवदत् यत् पुष्प–महोत्सवः फरीदाबादस्य प्रमुख–आकर्षणेषु एकः अस्ति। सः पौधारोपण–अभियानस्य उल्लेखं कृत्वा अवदत् यत् पूर्वं बहुल–स्तरे पादप–वितरणं कृतम्, तथा जनाः केवलं वृक्षारोपणं न कृतवन्तः, अपितु तेषां संरक्षणं पोषणं च अपि कृतवन्तः।

अस्मिन् कार्यक्रमे त्रयः स्वच्छता–कर्मचारिणः तथा त्रयः मालाकाराः सम्मानिताः। मंच–सञ्चालनं डा.सुप्रिया–ढाण्डा कृतवती।

कार्यक्रमे एडिशनल–कमिश्नर सलोनी–शर्मा, गौरव–अन्तिलः, जॉइंट–कमिश्नर अस्वीर–सिंहः, पार्षदाः मनोज–नसावा, मुकेश–अग्रवालः, पवन–यादवः, सचिन–शर्मा, प्रियंका–बिष्टः, जसवंत–सैनी इत्यादयः, सेक्टर–क्षेत्राणां गणमान्य–निवासिनः तथा रेजिडेन्ट्स–वेलफेयर–एसोसिएशन–संस्थायाः अध्यक्षाः अपि उपस्थिताः आसन्।

हिन्दुस्थान समाचार / अंशु गुप्ता