चतरानगरम्, २१ मार्चमास: (हि.स.)। टण्डवा-प्रखण्ड-परिसरस्य समीपे स्थिते सरना-स्थले शनिवासरे प्रखण्ड-स्तरीयः सरहुल-पर्व हर्षोल्लासेन, पारम्परिक-विधिभि: तथा सांस्कृतिक-गरिमया सह सम्यक् आचरितम्। कार्यक्रमस्य अध्यक्षतां सरना-समितेः अध्यक्षः मोहन-उरांवः अकरोत्, संचालनं च शिक्षकः पौलूस-उरांवः कृतवान्।

कार्यक्रमे मुख्यातिथिरूपेण एनटीपीसी-एचओपी आलोक-त्रिपाठी, मगध-परियोजनायाः जीएम चितरंजन-कुमारः, विशिष्टातिथिरूपेण बीडीओ-सह-सीओ देवलाल-उरांवः, मध्य-जिप-सदस्यः सुभाष-यादवः, थाना-प्रभारी-सह-इन्स्पेक्टर पप्पू-शर्मा, मगध-पीओ एस.सत्यनारायणः, एजीएम नीरज-रायः तथा वरिष्ठ-प्रबन्धकः अभिषेक-आनन्दः उपस्थिताः आसन्।

अस्मिन् अवसरे प्रखण्डस्य विविध-ग्रामेभ्यः बहुसंख्यया आदिवासी-समाजस्य जनाः पारम्परिक-वेशभूषायां सम्मिलिताः अभवन्। पर्वण: आरम्भः सरना-स्थले विधिवत् पूजा-अर्चनया सह अभवत्, यत्र प्रकृतेः आराधना कृत्वा क्षेत्रस्य सुख-समृद्धेः तथा उत्तम-फलस्य कामना कृता। पाहनेन पारम्परिक-विधिना पूजा सम्पन्ना। कार्यक्रमात् पूर्वं उच्च-विद्यालय-टण्डवा-प्रांगणात् सरना-स्थलं यावत् भव्य-शोभायात्रा निष्क्रान्ता। अनन्तरं मांदर-नगाड़-वादनस्य तालपर्यन्तं युवक-युवत्यः पारम्परिक-नृत्यं प्रदर्श्य समग्रं वातावरणं उत्साहेन उमङ्गेन च परिपूर्णम् अकुर्वन्। मुख्यातिथिः आलोक-त्रिपाठी सरहुल-पर्व प्रकृति-पूजायाः आदिवासी-सांस्कृतिक-परिचयस्य च प्रतीकम् इति निरूप्य तस्य संरक्षणे बलं दत्तवान्।

तेन एनटीपीसी-पक्षतः २५,००० पादपानां रोपणस्य घोषणा अपि कृता। कार्यक्रमे सामाजिक-एकता, भ्रातृत्वभावः तथा प्रकृति-संरक्षणस्य संदेशः प्रदत्तः। अस्मिन् अवसरे सरना-समितेः सचिवः धनेश्वर-उरांवः, कोषाध्यक्षः जगेश्वर-उरांवः, राहम-मुखिया विश्वजीत-उरांवः, कल्याणपुर-मुखिया महेश-मुण्डा, मुखिया सीता-देवी, संतोष-नायकः, पूर्व-प्रमुखः सीताराम-साहू, उपमुखिया राजेश-साहू इत्यादयः बहुसंख्यकाः ग्रामवासिनः गणमान्यजनाश्च उपस्थिताः आसन्।

हिन्दुस्थान समाचार / अंशु गुप्ता