बलरामपुरम्, २५ मार्चमासः (हि.स.)। लोक-आस्थायाः सूर्य-उपासनायाश्च चतुर्दिवसीयस्य चैती-छठ-महापर्वणः समापनं बुधवासरे प्रातः छत्तीसगढ-प्रदेशस्य बलरामपुर-जनपदस्थिते रामानुजगञ्जे जीवनदायिन्याः कन्हर-नद्याः तटे निर्मिते छठ-घट्टे अभवत्। व्रतिनः उदित-सूर्याय अर्घ्यं समर्प्य स्वस्य कठोर-निर्जल-व्रतस्य पारणं कृतवन्तः।

बुधवासरे प्रातःकाले एव बहुसंख्यकाः व्रतिनः पुरुषाश्च पारम्परिक-वेशभूषायां घट्टम् आगतवन्तः। छठी-मातुः गीतैः भजनैश्च श्रद्धालवः विधिपूर्वकं भगवतः सूर्यस्य उपासनां कृत्वा उदीयमान-सूर्याय अर्घ्यं समर्पितवन्तः। अस्मिन् समये समग्रं वातावरणं भक्तिमयं जातं तथा घट्टेषु आस्थायाः अद्भुतं दृश्यं दृष्टम्।

अस्मात् पूर्वं मङ्गलवासरे व्रतिभिः अस्तं गच्छते सूर्याय अर्घ्यं दत्तम्, यस्य अनन्तरं अद्य प्रातः उदित-सूर्याय अर्घ्यं दत्त्वा व्रतं सम्पन्नम्। षट्त्रिंशत्-होरात्मक-निर्जल-व्रतानन्तरं व्रतिनः प्रसादं गृहीत्वा पारणं कृतवन्तः।

छठ-घट्टेषु प्रशासनद्वारा सुरक्षा-स्वच्छता-प्रकाश-आदि आवश्यक-व्यवस्थाः सुनिश्चिताः आसन्, येन श्रद्धालूनां काचित् असुविधा न अभवत्। सम्पूर्ण-आयोजनस्य कालावधौ व्यवस्था सुचारुरूपेण प्रवृत्ता।

अनुकूल-ऋतुः अपि व्रतिनां कृते सहायकः अभवत्। मन्द-शीतलतायाः सम्यक् वातावरणस्य च मध्ये श्रद्धालवः पूर्ण-उत्साहेन श्रद्धया च महापर्व सम्पन्नवन्तः।उल्लेखनीयम् यत् छठ-महापर्वणि सूर्य-देवस्य छठी-मातुः च आराधनां कृत्वा परिवारस्य सुख-समृद्धि-स्वास्थ्य-सुखानां कामना क्रियते। रामानुजगञ्जे अस्मिन् वर्षे अपि एतत् पर्व पूर्ण-श्रद्धया उल्लासेन भव्यतया च सम्पन्नम्।

हिन्दुस्थान समाचार / अंशु गुप्ता