Enter your Email Address to subscribe to our newsletters
ग्वालियरनगरम्, २५ मार्चमासः (हि.स.)। मध्यप्रदेशस्य ग्वालियर-जनपदे सञ्चाल्यमानेषु विभिन्न-विद्यालयेषु अध्ययनरत-विद्यार्थिनां कृते अल्प-मूल्येन पुस्तकानि, वस्त्राणि, लेखन-सामग्री च उपलब्धं कर्तुं ग्वालियर-नगरे अद्य आरभ्य दश-दिवसीयः पुस्तक-मेलापकः आयोज्यते।
प्रदेश-सर्वकारस्य अभिप्रायानुसारं एषः पुस्तक-मेलापकः जनपद-प्रशासनेन ग्वालियर-मेला-क्षेत्रे सूर्य-नमस्कार-तिराहा-समीपे स्थिते शिल्प-विपणम् (दस्तकारी-हाट-बाजार) इत्यत्र आयोज्यते, अस्य पुस्तक-मेलापकस्य शुभारम्भः सायं षड्वादने भविष्यति। अस्मिन् पुस्तक-मेलापके सीबीएसई, आईएसई तथा एमपी-बोर्ड-संबद्धानां सर्वेषां वैयक्तिक-विद्यालयानां पाठ्यक्रमानुसारं पुस्तकानि वस्त्राणि च उपलब्धानि भविष्यन्ति।
पुस्तक-मेलापकं प्रति पुस्तक-विक्रेतॄणां अभिभावकानां बालकानां च मध्ये उत्साहः दृश्यते। जनपद-प्रशासनेन बालकानां तेषां अभिभावकानां हितं दृष्ट्वा कृतस्य पुस्तक-मेला-आयोजन-निर्णयस्य पुस्तक-प्रकाशकैः विक्रेतृभिश्च स्वागतं कृतम्। पुस्तक-विक्रेतृभ्यः जनपदस्य विभिन्न-विद्यालयानां पाठ्यक्रमाः प्रदत्ताः सन्ति। तान् प्रति निर्देशः अपि दत्तः यत् निर्धारित-पाठ्यक्रमानुसारं पुस्तक-समूहाः विद्यार्थिभ्यः तेषां अभिभावकेभ्यश्च उपलब्धाः क्रियन्ताम्।
पुस्तक-विक्रेतृभिः पूर्वमेव स्पष्टं कृतं यत् पुस्तक-मेलापके पुस्तकानि, लेखन-सामग्री, वस्त्राणि इत्यादिनां क्रयणं कुर्वतां अभिभावकानां कृते विशेष-शिथिलता प्रदास्यते। पुस्तक-मेलापकस्य आयोजनात् अनधिकृत-पुस्तक-विक्रय-प्रवृत्तौ अपि प्रभावी-निरोधः भविष्यति। उपायुक्ता रुचिका-चौहानः स्पष्टं उक्तवती यत् पुस्तक-मेलापक-अवधौ विपण-क्षेत्रे कस्यापि पुस्तक-आपणात् विद्यालय-पुस्तकानि लेखन-सामग्री च विक्रेतुं न शक्यन्ते। अस्मिन् विषये पुस्तक-विक्रेतारः संघ-अधिकारिणश्च सामूहिक-रूपेण सम्मतिं व्यक्तवन्तः।
आर्थिक-दृष्ट्या दुर्बल-परिवाराणां बालकानां कृते बुक-बैंक इत्यपि स्थाप्यते। निःशुल्क-पुस्तक-प्रदानार्थं पुस्तक-मेलापक-परिसरे बुक-बैंक-इत्यस्य स्थापना क्रियते। ये विद्यार्थिनः स्वस्य पूर्व-कक्षायाः पुस्तकानि दातुम् इच्छन्ति, ते बुक-बैंक-इत्यत्र स्व-पुस्तकानि समर्पयितुं शक्नुवन्ति। गत-वर्षे स्थापितात् बुक-बैंक-इत्यस्मात् सप्तशतं (७००) आवश्यकतावन्तः बालकाः निःशुल्क-पुस्तकानि प्राप्तवन्तः।
पुस्तक-विक्रेतॄणां विद्यार्थिनां तेषां अभिभावकानां साहाय्यार्थं जनपद-प्रशासनेन जनपद-शिक्षा-अधिकारी-माध्यमेन सहायता-संख्या अपि प्रकाशिताऽस्ति। जनपद-शिक्षा-अधिकारी-कार्यालयस्य समन्वयकः आईटी-सेल अरविन्द-तोमरः (दूरभाषः ९८९३५-८७५७३) इत्यनेन संपर्कं कृत्वा पुस्तक-मेलापकस्य विषये सूचना प्राप्तुं शक्यते, समस्याः अपि निवेदयितुं शक्यन्ते।
प्रशासनेन अग्रिम ०३ अप्रैलमासपर्यन्तं चलिष्यमाणस्य अस्य पुस्तक-मेलापकस्य कृते छात्र-छात्राणां तेषां अभिभावकानां च सर्वाः आवश्यक-व्यवस्थाः कृताः सन्ति। वाहन-स्थापनार्थं पृथक् वाहनस्थापन-व्यवस्था अपि कृता अस्ति।
हिन्दुस्थान समाचार / अंशु गुप्ता