भागलपुरम्, २७ मार्चमासः (हि.स.)। रामनवमी-पावन-अवसरे शुक्रवासरे भागलपुर-नगरं भक्ति-श्रद्धा-उत्साह-रङ्गैः पूर्णतया मग्नम् इव दृष्टम्। हिन्दुत्व-सेवा-संघस्य तत्त्वावधाने आयोजितया भव्य-शोभायात्रया सम्पूर्णं नगरं राममयं कृतम्। सहस्रशः श्रद्धालवः अस्मिन् आयोजने सहभागीभूत्वा “जय श्रीराम” इत्यादि-घोषैः वातावरणं भक्तिमयं कृतवन्तः। प्रत्येक-वीथीषु, प्रत्येकं चतुष्पथे, प्रत्येकं मार्गे च जनानां उत्साहः द्रष्टुं मनोहरः आसीत्।

अस्याः भव्य-शोभायात्रायाः आरम्भः मायागंज-स्थित-महाकालेश्वर-मन्दिरात् विधिवत् पूजार्चनया वैदिक-मन्त्र-उच्चारणेन सह कृतः। मन्दिर-परिसरे विशेष-पूजनानन्तरं भगवतः श्रीरामस्य आशीर्वादं गृहीत्वा शोभायात्रा प्रस्थितवती। अनन्तरं एषा यात्रा नगरस्य विभिन्न-प्रमुख-मार्गैः- घण्टाघर-चतुष्पथं, स्टेशन-मार्गं, तिलकामांझी-चतुष्पथं इत्यादिभिः सह बहूनि क्षेत्राणि अतिक्रम्य पुनः मायागंज-स्थित-महाकालेश्वर-मन्दिरं प्राप्त्वा सम्पन्ना। सम्पूर्ण-मार्गे श्रद्धालूनां विशाल-सम्मर्दः आसीत् तथा स्थाने स्थाने जनैः पुष्प-वृष्ट्या शोभायात्रायाः स्वागतं कृतम्।

यात्रा-काले भगवतः श्रीरामस्य भव्य-प्रतिमा, भारत-मातुः आकर्षकी प्रदर्शिनी, नन्देः सजीव-प्रस्तुतिः च श्रद्धालूनां विशेष-आकर्षणस्य केन्द्रं बभूव। भक्ति-गीतानां मधुर-ध्वनिः, मृदङ्गानां निनादः, वाद्य-वृन्दस्य तालः, लेजर-प्रकाशस्य च शोभा सम्पूर्णं वातावरणं दिव्यं उत्सवमयं च अकरोत्। अस्मिन् वर्षे शोभायात्रायाः विशेष-आकर्षणं मंजूषा-कलया सज्जिता पारम्परिक-वृषभ-शकटिका आसीत्। स्थानीय-कला-संस्कृतेः प्रदर्शनं कुर्वती एषा शकटिका अतीव सुन्दर-रूपेण अलङ्कृता आसीत्। मंजूषा-चित्रकला-सुसज्जिता एषा प्रस्तुतिः जनानां मनांसि हरति स्म तथा सम्पूर्ण-मार्गे आकर्षणस्य केन्द्रं बभूव।

कार्यक्रमे महिलानां कन्यानां च सहभागिता विशेषतया उल्लेखनीया आसीत्। बहुसंख्याः महिलाः पारम्परिक-वेषभूषया सहभागित्वं कृत्वा शोभायात्रायाः भव्यतां वर्धितवन्त्यः। कतिपयेषु स्थानेषु महिलाभिः दण्ड-प्रदर्शनं कृत्वा स्व-शक्ति-आत्मरक्षा-कौशलं सांस्कृतिक-परम्परां च प्रदर्शितम्, येन उपस्थिताः जनाः रोमाञ्चिताः अभवन्। शोभायात्रायां यूनां उत्साहः अपि द्रष्टुं योग्यः आसीत्। हस्तेषु भगवाध्वजान् धारयन्तः युवानः “जय श्रीराम” इति घोषं कुर्वन्तः सम्पूर्ण-मार्गे ऊर्जां सञ्चारितवन्तः। वृद्धानां बालकानां च विशालः सहभागः आसीत्, येन एतत् आयोजनं जन-जनस्य उत्सवः अभवत्।

श्रद्धालूनां सुविधां दृष्ट्वा स्थाने स्थाने सेवा-शिविराणि स्थापितानि, यत्र शीतलपेयं, जलं प्रसादं च व्यवस्थिताः आसन्। स्थानीय-जनैः सामाजिक-संस्थाभिः च सेवा-भावेन एताः व्यवस्थाः कृताः, यासां जनैः प्रशंसा कृता। शोभायात्रायाः समापनानन्तरं मायागंज-स्थित-महाकालेश्वर-मन्दिर-परिसरे भव्य-सांस्कृतिक-कार्यक्रमस्य आयोजनं कृतम्।अस्मिन् काले भक्ति-गीतानि, नृत्य-प्रस्तुतयः धार्मिक-कार्यक्रमाश्च श्रद्धालून् मन्त्रमुग्धान् अकुर्वन्। अस्मिन् आयोजने हिन्दुत्व-सेवा-संघस्य अध्यक्षः नीलमणिः उर्फ सोनू-सम्राट्, संयोजकः विजय-यादवः, विनय-सिंहः, प्रमोद-सिंहः, कन्हैयालालः, रूपेश-सिंहः, शाण्डिल्य-नन्दिकेशः, अजीत-यादवः, आकाश-कुमारः, आतिश-राजः, अमन-वर्मा, मिक्की-कुमारः, दीपलव-राणा, बमबम-कुमारः, राजवीरः, रौशनः, गुल्लू, दीपक-पाण्डेयः, सिट्टू, भुपाली-यादवः इत्यादयः उपस्थिताः आसन्। एतेषां समर्पणेन कार्यक्रमः सफलतया सम्पन्नः।

सुरक्षा-व्यवस्थां दृष्ट्वा प्रशासनं पूर्णतया सतर्कम् आसीत्। नगरस्य विभिन्न-भागेषु आरक्षक-दलस्य सज्जता कृता, संवेदनशील-क्षेत्रेषु विशेष-निरीक्षणं च स्थापितम्। प्रशासनस्य सतर्कतया उत्तम-व्यवस्थापनस्य च कारणेन एतत् भव्य-आयोजनं शान्तिपूर्ण-रीत्या सम्पन्नम्।

हिन्दुस्थान समाचार / अंशु गुप्ता