जयपुरनगरम्, २८ मार्चमासः (हि.स.)। पूर्व-मुख्यमन्त्री अशोक-गहलोतः स्वस्य सामाजिक-माध्यम-शृङ्खलायाः ‘इन्तजारशास्त्र’ इत्यस्य षष्ठे भागे प्रदेशस्य भाजपा-सर्वकारस्य नीतिषु तीव्रं प्रहारं कृतवान्। तेन आरोपितं यत् राज्य-सर्वकारस्य क्रीडासु उदासीनतया जयपुरे प्रस्तावितस्य अन्ताराष्ट्रिय-क्रिकेट-क्रीडाङ्गणस्य परियोजना स्थगिता जाता।

गहलोतः उक्तवान् यत् भाजपा-सर्वकारस्य वृत्तिः केवलं स्वास्थ्य-विकास-परियोजनासु एव न, अपि तु क्रीडा-सुविधानां विस्तारस्य विषये अपि अनास्थां दर्शयति। तेन अपि आरोपितं यत् गत-सपाद-द्विवर्षेषु राजस्थान-क्रिकेट-सङ्घस्य स्थितिः अपि दुर्बला जाता, अद्यावधि नूतन-अध्यक्षस्य निर्वाचनम् अपि न सम्पन्नम्। पूर्व-मुख्यमन्त्री अवदत् यत् कांग्रेस-सर्वकारस्य काले जयपुरस्य चौंप-क्षेत्रे अन्ताराष्ट्रिय-स्तरस्य क्रिकेट-क्रीडाङ्गण-निर्माणस्य योजना सिद्धा आसीत्। ५ फरवरीमासे २०२२ तमे दिने अस्य शिलान्यासः कृतः। एतत् क्रीडाङ्गणं विश्वस्य तृतीयं भारतस्य द्वितीयं च महत्तमं क्रिकेट-क्रीडाङ्गणं भवितुम् आसीत्।

गहलोतानुसारं परियोजनायाः प्रथम-चरणे ४५ सहस्र-दर्शकाणां क्षमता निर्धारिता, या द्वितीय-चरणे ७५ सहस्रं यावत् वर्धनीया आसीत्। योजनानुसारं प्रथम-चरणं फरवरीमास २०२४ पर्यन्तं पूर्णं भवितुम् आसीत्, किन्तु ३६ मासाधिक-कालस्य अतीतत्वेऽपि निर्माण-कार्यम् अपूर्णम् अस्ति। तेन उक्तं यत् कोटि-रूप्यकाणां व्ययात् अपि परियोजना अधरे एव लम्बिता, समीपे भविष्यति पूर्णतायाः कश्चन संकेतः अपि न दृश्यते।

गहलोतः सञ्चेतनां दत्तवान् यत् विलम्बात् निर्माण-व्ययः निरन्तरं वर्धते, यस्य भारः सामान्य-जनानां क्रीडा-प्रेमिणां च उपरि पतिष्यति। तेन प्रश्नः कृतः यत् किम् भाजपा-सर्वकारः राजस्थानं क्रीडा-क्षेत्रे अग्रे गन्तुम् न इच्छति। पूर्व-मुख्यमन्त्री सर्वकारं प्रति आग्रहं कृतवान् यत् राजनैतिक-द्वेषात् उपरि उत्थाय अन्ताराष्ट्रिय-क्रीडाङ्गण-परियोजनां प्राधान्येन स्वीक्रियताम्, क्रीडकानां स्वप्न-सिद्ध्यर्थं च शीघ्रं पूर्णता क्रियताम्।

हिन्दुस्थान समाचार / अंशु गुप्ता