Enter your Email Address to subscribe to our newsletters
कार्बी-आङ्ग्लोङ्गः, २९ मार्चमासः (हि.स.)। असम-विधानसभा-निर्वाचनस्य प्रचारार्थं मल्लिकार्जुनखड़गे-इत्यस्य असम-भ्रमणं प्रति मुख्यमन्त्री हिमंतबिस्वासरमा रविवासरे कटाक्षं कृतवान्। तेन दलस्य नेतृत्व-निर्वाचनं तथा खड़गे-महाभागस्य पूर्ववृत्तं प्रति गम्भीराः प्रश्नाः अपि उत्थापिताः।
ज्ञातव्यम् यत् अद्य राज्यस्य पर्वतीय-जनपदे कार्बी-आङ्ग्लोङ्गे बोकाजन-विधानसभा, डिफू-विधानसभा, हावराघाट-विधानसभा तथा आमरी-विधानसभा-क्षेत्रेषु चतुर्षु निर्वाचन-विजय-संकल्प-सभासु मुख्यमन्त्री सहभागितां कृतवान्। सभासु उपस्थितानां जनानां बहुल-संख्यां दृष्ट्वा सः अत्यन्तम् उत्साहितः अभवत्। तेन उक्तं यत् भारतीयजनतापक्षस्य विजयः पूर्णतया सुनिश्चितः अस्ति।
अस्मिन् अवसरे माध्यमान् प्रति सम्बोधयन् डॉ.सर्मा उक्तवान् यत् भारतीयराष्ट्रीयकांग्रेस-दलेन असमे खड़गे-महाभागं प्रमुख-प्रचार-मुखरूपेण प्रस्तूय रणनीतिक-त्रुटिः कृता अस्ति। तेन व्यङ्ग्येन उक्तं यत् खड़गे-महाभागम् आनयित्वा कांग्रेस-दलेन स्वपादयोः एव कुठाराघातः कृतः।
तेन अग्रे आरोपितं यत् खड़गे-महाभागेन पूर्वम् असमस्य सांस्कृतिक-प्रतीकस्य भूपेन हजारिका-महाभागाय भारत-रत्न-पुरस्कार-प्रदानस्य विरोधः कृतः। डॉ.सर्मा इदमपि अवदत् यत् खड़गे-महाभागेन असमे प्रस्तावितस्य सेमिकण्डक्टर-परियोजनायाः स्थापनेऽपि विरोधः कृतः, यत् राज्यस्य औद्योगिक-प्राविधिक-उन्नतेः दिशि महत्त्वपूर्णं पदम् इति राज्य-सर्वकारेण निर्दिष्टम्।
कांग्रेस-दलस्य प्रचार-रणनीतिं प्रति चिन्तां व्यक्तयन् मुख्यमन्त्री पृष्टवान्— “किम् एतादृशः जनः यं यूयं असमे ‘स्टार-प्रचारक:’ इति स्थापयथ?” मल्लिकार्जुन: खड़गे रविवासरे लखीमपुर-नगरे ९ अप्रैल-मासे भवितव्यस्य असम-विधानसभा-निर्वाचनस्य कृते कांग्रेस-दलस्य घोषणापत्रं प्रकाशयिष्यति। तेन सह दलं राज्ये स्वस्य प्रचार-अभियानं तीव्रं कर्तुं प्रवृत्तम् अस्ति। एषा घोषणा जितेंद्रसिंहेन कृता, येन निर्वाचन-पूर्वं दलस्य सज्जता-रणनीतिः अपि ज्ञापिता।
हिन्दुस्थान समाचार / अंशु गुप्ता