पटनानगरम्, ०५ मार्चमासः (हि.स.)। भारतीय–जनता–पक्षस्य राष्ट्रीयाध्यक्षः तथा बिहार–राज्यस्य बांकीपुर–विधानसभाक्षेत्रस्य विधायकः नितिन–नवीनः गुरुवासरे राज्यसभायै नामांकनपत्रं समर्पितवान्। अस्मिन् अवसरे सः उक्तवान् यत् बांकीपुर–क्षेत्रस्य जनतया सह तस्य आत्मीय–सम्बन्धः अनवरतं प्रवर्तिष्यते।

नामांकन–समर्पणानन्तरं नितिन–नवीनः सामाजिक–माध्यमे सन्देशं प्रकाशितवान्। सः अवदत् यत् राज्यसभायै नामांकनं समर्पयन् सः तां दीर्घां यात्रां स्मरति, या बांकीपुर–जनतया सह संयुक्ततया सम्पन्ना। तेन उक्तम् यत् पटना–पश्चिम (बांकीपुर) क्षेत्रस्य जनाः तं मार्गदर्शनं कर्तुं सहायकाः अभवन् तथा गत–द्विदशाधिक–वर्षेभ्यः प्राप्तं विश्वासं स्नेहं च तस्य प्रेरणास्त्रोत: जातम्।

सः अवदत् यत् श्रीराम–नवमी–उत्सवस्य शोभायात्रा–व्यवस्था, आस्था–पर्वाणां आयोजनम्, तथा बांकीपुर–क्षेत्रस्य विकास–संकल्पाः इत्यादिषु कार्येषु सदा जनविश्वासस्य प्रतिनिधिरूपेण कार्यं कृतवान्। अधुना राज्यसभायै नामांकनसमये अपि सेवा–कर्तव्ययोः दृढः संकल्पः अस्ति।

उल्लेखनीयम् यत् राज्यसभा–निर्वाचनाय नामांकनकर्तृषु भाजपाया: नितिन–नवीनः, जदयू–पक्षस्य राष्ट्रीयाध्यक्षः तथा मुख्यमन्त्री नीतीश–कुमारः, राष्ट्रिय–लोक–मोर्चा–अध्यक्षः उपेन्द्र–कुशवाहा च सन्ति। अस्मिन् अवसरि केंद्रीय–गृहमन्त्री अमित–शाहः अपि उपस्थितः आसीत्।

हिन्दुस्थान समाचार / अंशु गुप्ता