रायपुरनगरम्, ०६ मार्चमासः (हि.स.) — छत्तीसगढ–राज्यस्य शासनेन कृषक–कल्याणं सर्वोच्च–प्राथमिकतां दत्त्वा तादृशा: प्रभावशीलाः नीतयः कार्यान्विता:, याभिः अन्नदातृणां जीवनमध्ये स्थायी–व्यापक–परिवर्तनानि स्पष्टतया दृश्यन्ते। एतै: प्रयत्नै: न केवलं कृषकाणां आयः आत्मविश्वासश्च सुदृढीकृतौ, अपितु ग्रामीण–अर्थव्यवस्थायै अपि नूतना गतिः दृढता च प्रदत्ता। सुशासनस्य प्रतिबद्धतां साकारं क्रियमाणे शासने कृषक–उन्नति–योजनायाः अन्तर्गतं खरीफ–विपणन–वर्षे २०२५–२६ मध्ये धान्यं विक्रयितवन्तः कृषकाः अन्तर–राशेः एकसार्धं भुगतानं प्राप्तवन्तः।

मुख्यमन्त्रिणः सायस्य इच्छानुसारं सुनिश्चितं कृतम् यत् होली–पर्वण: पूर्वमेव कृषकाणां धनागारेषु धनराशिः अन्तरिता भवेत्, येन ते स्वपरिवारैः सह हर्षोल्लासेन सम्मानपूर्वकं च उत्सवं आचरितुं शक्नुयुः। शासनस्य अस्य संवेदनशील–निर्णयस्य प्रभावात् कोरबा–जनपदस्य कृषकेषु विशेष–उत्साहस्य वातावरणं दृश्यते।

कोरबा–जनपदस्य दादरखुर्द–ग्राम–निवासी कृषकः शैलेन्द्रकुमार–थवाईत: इत्यनेन अस्मिन् वर्षे प्रायः ३२ क्विन्टल–परिमितं धान्यं विक्रीतम्, यस्य प्रतिफलरूपेण तस्मै २३ सहस्र ३९२ रूप्यकाणां अन्तर–राशिः प्राप्ता। सः प्रसन्नतां व्यक्तवान् यत् शासनस्य अयं निर्णयः कृषकहिते अत्यन्तं उपयोगी अस्ति, समये प्राप्त्या राश्या तस्मै महान् लाभः जातः। सः एतस्याः धनराशेः उपयोगं स्वपुत्राणां शिक्षायै तथा उन्नत–कृषि–प्रौद्योगिकी–स्वीकाराय करिष्यति, येन उत्पादन–क्षमता आयश्च उभयं वर्धिष्यते।

एवमेव कल्दामार–ग्रामस्य कृषकः जिमी–राठिया उक्तवान् यत् होली–पर्वण: पूर्वं धनराशेः प्राप्तिः तस्मै कस्यचित् उपहारस्य तुल्या अनुभूयते। तेन उक्तं यत् प्राप्ता धनराशिः गृह–आवश्यकतानां पूर्त्यर्थं तथा प्रधानमन्त्रिणः आवास–योजनायाः अन्तर्गतं निर्माण–कार्ये उपयुज्यते। शासनद्वारा समयबद्ध–भुगतानं कृतम् इति तेन कृषकान् प्रति संवेदनशीलतायाः प्रतीकत्वेन निरूपितम्।

कृषकाः मुख्यमन्त्रिणं साय–महाभागं प्रति कृतज्ञतां व्यक्तवन्तः। ते अवदन् यत् छत्तीसगढ़–शासनस्य एतेन संवेदनशील–समयबद्ध–निर्णयेन कृषकाणां जीवनमध्ये स्थिरता सुरक्षा–भावना च वर्धिता। शासनस्य एषः प्रयासः कृषक–समृद्धिम् प्रदेशस्य समग्र–प्रगतेः आधाररूपेण प्रतिष्ठापयति।

हिन्दुस्थान समाचार / अंशु गुप्ता