Enter your Email Address to subscribe to our newsletters
भोपालनगरम्, ०१ अप्रैलमासः (हि.स.) - मध्यप्रदेशस्य उपमुख्यमन्त्री राजेन्द्र-शुक्लः बुधवासरे भोपाल-मन्त्रालये ग्वालियर-जबलपुर-स्थितयोः शासकीय-चिकित्सा-महाविद्यालययोः प्रस्तावित-सुदृढीकरण-उन्नयन-कार्याणां वृहद् समीक्षां कृतवान्। सः प्रस्तावान् प्राथमिकतया शीघ्रम् अन्तिमरूपं दातुं निर्देशान् अयच्छत्।
उपमुख्यमन्त्री उक्तवान् यत् एतेषु चिकित्सा-महाविद्यालयेषु अत्याधुनिक-सुविधाः विकसिताः स्युः तथा रोगिणां सौविध्यर्थम् उन्नत-चिकित्सायाः सर्वाणि प्रावधानानि सुनिश्चितानि क्रियन्ताम्। सभायां लोक-स्वास्थ्य-चिकित्सा-शिक्षा-विभागस्य अपर-मुख्य-सचिवः अशोक-बर्णवालः, आयुक्तः धनराजू-एस, बीडीसी-प्रबन्ध-निदेशकः सीबी-चक्रवर्ती इत्यादयः वरिष्ठ-अधिकारिणः उपस्थिताः आसन्।
तेन निर्देशितं यत् सर्वेषु प्रस्तावेषु त्वरित-कार्यवाही क्रियेत तथा समयबद्धरूपेण स्वीकृति-क्रियान्वयनयोः दिशि कार्यं क्रियेत, येन प्रदेशे स्वास्थ्य-सेवाः अधिकं सुदृढाः सुलभाः च स्युः।
समीक्षायां सूचितं यत् ग्वालियर-स्थितस्य जयारोग्य-चिकित्सालयस्य उन्नयन-सुदृढीकरणार्थं प्रथम-चरणे प्रायः ९११ कोटि-रूप्यकाणां व्ययेन प्रस्तावः सिद्धः। अस्मिन् चरणे एमसीएच तथा सुपर-स्पेशलिटी-चिकित्सालयस्य उन्नयनं विविध-निर्माण-कार्याणि च समाविष्टानि सन्ति। कार्य-समाप्तेः अनन्तरं निर्मित-क्षेत्रे प्रायः ३० प्रतिशत-वृद्धिः भविष्यति, हरित-क्षेत्रे ७–८ प्रतिशत-विस्तारः करिष्यते।
एवं नेताजी-सुभाषचन्द्र-बोस-चिकित्सा-महाविद्यालये जबलपुरे वर्तमानः ७५०-शय्या-चिकित्सालयः उन्नीय १२००-शय्यापर्यन्तं विस्तारितः भविष्यति। सुपर-स्पेशलिटी-चिकित्सालयस्य विस्तारः, छात्रावास-सुविधा-विकासः, आवासीय-भवन-निर्माणं च प्रस्तावितम्।
गजरा-राजा-चिकित्सा-महाविद्यालये ग्वालियरनगरे चरणबद्ध-विकास-कार्याणि अपि प्रस्तावितानि। प्रथम-चरणे १०५०-शय्या-मातृ-शिशु-चिकित्सालयः, ६००-शय्या-विशेष-चिकित्सालयः, १००-शय्या-क्षयरोग-एकान्त-वार्ड-विस्तारः, १००-शय्या-कैंसर-चिकित्सालय-विस्तारः च करिष्यते। प्रशासनिक-भवनम्, नर्सिंग-महाविद्यालयः, छात्रावासः, आवासीय-एककाः, पार्किंग-व्यवस्था च निर्मास्यते। द्वितीय-चरणे १५००-आसन-क्षमता-युक्तम् सभागारम्, रोगिणां परिजनानां कृते निवास-व्यवस्था, केन्द्रीय-औषधि-भण्डारः, पीजी-छात्रावास-भवनं च निर्मास्यते।
हिन्दुस्थान समाचार / अंशु गुप्ता