लखनऊनगरम्, १३ अप्रैलमास: (हि.स.)। भारत-रत्न-बाबा-साहेब-डॉ.भीमराव-अम्बेडकरस्य जयंती-पूर्व-सन्ध्यायां राष्ट्रिय-लोकदलस्य (रालोद) प्रदेश-कार्यालये लखनऊनगरे प्रदेशाध्यक्षस्य रामाशीषरायस्य अध्यक्षतायां गरिमामयः जयंती-कार्यक्रमः आयोजितः। अस्मिन् अवसरे उपस्थिताः पक्ष-नेतारः कार्यकर्तारश्च बाबा-साहेबस्य चित्रे पुष्पाणि अर्पयित्वा श्रद्धाञ्जलिं दत्तवन्तः तथा तस्य विचारान् स्मृतवन्तः।

प्रदेशाध्यक्षः डॉ.रामाशीष-रायः अवदत् यत् बाबा-साहेबः केवलं संविधान-निर्माता न, अपितु सामाजिक-न्यायस्य समानतायाश्च महत्तमः प्रहरी आसीत्। सः स्वजीवनं सम्पूर्णतया समाजस्य वञ्चित-शोषित-पश्चाद्वर्गाणां अधिकार-सङ्घर्षाय समर्पितवान्।

सः इदमपि अवदत् यत् अद्यतन-समये बाबा-साहेबस्य विचाराः अधिकं प्रासङ्गिकाः जाताः, यतः समाजे असमानता तथा भेदभावस्य समस्याः अद्यापि विद्यन्ते। सः उक्तवान् यत् राष्ट्रिय-लोकदलं सामाजिक-समरसतां समान-अवसरं न्यायपूर्ण-व्यवस्थां च स्थापयितुं प्रतिबद्धम् अस्ति।

सः कार्यकर्तृभ्यः आह्वानं कृतवान् यत् ते केवलं जयंती-आयोजनपर्यन्तं न सीमिताः स्युः, अपितु बाबा-साहेबस्य “शिक्षिताः भवत, सङ्घटिताः भवत, संघर्षं कुरुत” इति मूलमन्त्रं जीवनं प्रति आचरेयुः।

अस्मिन् अवसरे अन्येऽपि नेतारः विचारान् प्रस्तुतवन्तः तथा सर्वैः बाबा-साहेबस्य चित्रे पुष्पाञ्जलिः अर्पिता। कार्यक्रमस्य समापनं धन्यवाद-ज्ञापनेन अभवत्।

हिन्दुस्थान समाचार / अंशु गुप्ता