Enter your Email Address to subscribe to our newsletters
धमतरीनगरम्, १६ अप्रैलमासः (हि.स.)। धमतरी-नगरस्य कर्मचारी-भवने बंगाली-समाजेन गुरुवासरे नववर्षोत्सवः महोत्साहेन पारम्परिक-गरिमया सह च आयोजितः। कार्यक्रमस्य अध्यक्षता समाजाध्यक्षः संजय-भट्टाचार्यः अकरोत्, सञ्चालनं च सचिवः दिनेश-डे कृतवान्। वरिष्ठ-सदस्यैः दीप-प्रज्वलनेन कार्यक्रमस्य शुभारम्भः कृतः।
माता-शारदा-बङ्ग-महिला-संस्थायाः अध्यक्षा मुक्ता-नाग-चौधरी नववर्षस्य पारम्परिक-आचारान् विवृण्वती उक्तवती यत् अस्मिन् दिने गृहेषु विशेष-पूजार्चना क्रियते, जनाः परस्परं प्रणम्य मिष्टान्नं भुञ्जते, नूतन-वस्त्राणि धारयन्ति च। व्यापारीणां कृते “हालखाता” इत्यस्य आरम्भः अपि अस्य दिनस्य विशेषता अस्ति।
सांस्कृतिक-कार्यक्रमे रञ्जना-भट्टाचार्यस्य मार्गदर्शनेन बालिकाः महिलाश्च गीत-नृत्य-प्रस्तुतयः अदर्शयन्। विशेषतया रवीन्द्रनाथ-टैगोरस्य नृत्य-नाटिका सर्वेषां मनांसि आकृष्टवती। अन्ते सर्वे सदस्याः परस्परं नववर्ष-शुभाशयाः दत्त्वा पारम्परिक-बङ्गाली-भोजनस्य आस्वादं कृतवन्तः।
हिन्दुस्थान समाचार / अंशु गुप्ता