Enter your Email Address to subscribe to our newsletters
वॉशिंगटनम्, 16 अप्रैलमासः (हि.स.)।
विश्वबैंकः वैश्विक-जल-संकटस्य समाधानाय एकां महत्त्वाकांक्षिणीं योजनां घोषितवान्। “वॉटर फॉरवर्ड” इति नाम्ना अस्य कार्यक्रमस्य लक्ष्यं अस्ति यत् आगामिषु चतुर्षु वर्षेषु एक-अर्बुदं (१०० कोटि) जनान् सुरक्षितं विश्वसनीयं च जलं प्रदातुम्।
विश्वबैंकस्य अनुसारम् अस्य उपक्रमस्य अन्तर्गतं जल-आपूर्ति-प्रणाल्याः सुदृढीकरणं क्रियते, तथा च अनावृष्टि-प्रलय-इत्यादिषु आपदासु प्रतिसहनीयता वर्ध्यते। बैंकः अवदत् यत् सः स्वस्य वित्तीय-सहाय्येन तथा तकनीकी-विशेषज्ञतया २०३० वर्षपर्यन्तं प्रायः चत्वारिंशत्-कोटि जनानां कृते उत्तम-जल-सेवाः उपलब्धाः करिष्यति, यदा तु अन्येषां कृते सहायता भागिनि-संस्थाभिः सहकार्येण प्रदास्यते।
अस्मिन् कार्यक्रमे अनेकाः अन्ताराष्ट्रिय-संस्थाः अपि सम्मिलिताः भविष्यन्ति, यथा क्षेत्रीय-विकास-बैंकाः, अन्तरराष्ट्रीय-विकासार्थम् ओपेक-निधिः, न्यू-डेवलपमेंट-बैंक इत्यादयः। तथापि अस्य उपक्रमस्य कुल-निवेश-राशिः अद्यापि प्रकाशितं नास्ति।
विश्वबैंकः उक्तवान् यत् विश्वस्य प्रायः अर्धा जनसंख्या—अर्थात् लगभग् चत्वारि-अर्बुदानि (४०० कोटयः) जनाः—जल-संकटं अनुभवन्ति। अस्य कारणानि सन्ति दुर्बल-नीतयः, अपर्याप्त-नियमाः, तथा आर्थिकदृष्ट्या अस्थिराः जल-आपूर्ति-प्रणाल्यः, येन निवेशस्य सुधारस्य च गतिः मन्दीभवति।
अधुना चतुर्दश (१४) देशाः अस्य कार्यक्रमस्य अन्तर्गतं स्वेषां जल-क्षेत्रस्य सुदृढीकरणाय सुधार-प्रतिज्ञां कृतवन्तः। विशेषज्ञाः मन्यन्ते यत् केवलं आधारभूत-संरचनायाः स्थाने शासन-व्यवस्था-प्रबन्धनयोः सुधारः अस्य योजनायाः विशेषता अस्ति।
विशेषज्ञः डेविड् मिशेल् एतत् सकारात्मकं पदम् इति अवदत्, किन्तु चेतावनीं दत्तवान् यत् अस्य योजनायाः कार्यान्वयने बहवः बाधाः सम्भाव्याः सन्ति।
विश्वबैंकस्य मतम् अस्ति यत् सुदृढा जल-प्रणाली न केवलं जनानां मूलभूत-आवश्यकताः पूरयति, अपि तु आर्थिक-विकासाय, निवेशाय, रोजगार-सृजनाय च अत्यन्तम् आवश्यकम् अस्ति।
---------------
हिन्दुस्थान समाचार