देवघर-नगरम्, १९ अप्रैलमासः (हि.स.)। रविवासरे प्रातःकाले झारखण्ड-विधानसभायाः अध्यक्षः रविन्द्रनाथ-महतोः बाबा-वैद्यनाथ-धाम प्राप्तवान्, यत्र तेन सम्यक् विधि-विधानपूर्वकं भगवतः शिवस्य पूजार्चना कृता।

मन्दिर-प्राङ्गणे तीर्थ-पुरोहितैः वैदिक-मन्त्र-उच्चारणेन सह तस्य संकल्पः कारितः, अनन्तरं तेन श्रद्धया आस्थया च बाबा-वैद्यनाथस्य पूजा सम्पन्ना।

पूजाया अनन्तरं माध्यमैः सह वार्तालापं कुर्वन् सः अवदत् यत् बाबा-वैद्यनाथस्य कृपा सदा झारखण्ड-राज्ये विद्यमाना अस्ति। तेन राज्यस्य सुख-समृद्धये जन-मानसस्य कल्याणाय च प्रार्थना कृता तथा च बाबातः आशीर्वादः याचितः।

सः अपि अवदत् यत् सर्वेषां जनानां जीवने सुखं शान्तिश्च सदा वर्तेत—एषा एव तस्य प्रार्थना। अस्मिन् अवसरे तेन सह झामुमो-दलस्य वरिष्ठ-नेता सुरेश-साहः, श्यामकान्त-झा इत्यादयः तथा च जनपद-समितेः बहवः सदस्याः उपस्थिताः आसन्।

हिन्दुस्थान समाचार / अंशु गुप्ता