इन्दौरनगरम्, २१ अप्रैलमासः (हि.स.)। श्रृङ्गेरी-शारदा-पीठस्य जगद्गुरुः शङ्कराचार्यः विधुशेखर-भारती उक्तवान् यत् आदि-शङ्कराचार्येण भारतस्य एकीकरणाय चतुर्षु दिशासु आम्नाय-पीठानां स्थापना कृता, येभ्यः एकता-अद्वैतयोः सन्देशः प्रसारितः। अद्य तादृशानां प्रयासानाम् आवश्यकता अस्ति, येन तस्य विचाराः वैश्विक-स्तरं यावत् प्रसार्येरन्।

सः मध्यप्रदेशस्य खण्डवा-जनपदे स्थिते ओंकारेश्वरे आयोजितस्य पञ्च-दिवसीयस्य ‘एकात्म-पर्व’ इत्यस्य समापन-समारोहे वीडियो-माध्यमेन आशीर्वचनं दत्तवान्। अन्यैः साधु-सन्तैः अपि अद्वैत-सन्देशस्य विश्वव्यापी-प्रसारणाय आह्वानं कृतम्।

कार्यक्रमे स्वामी-अवधेशानन्द-गिरिः, स्वामी-तेजोमयानन्द-सरस्वती, मन्त्री धर्मेन्द्र-सिंह-लोढी इत्यादयः उपस्थिताः आसन्। वक्तृभिः उक्तं यत् शङ्कराचार्यस्य दर्शनं विश्वे शान्तेः, एकात्मतायाः च आधारः अस्ति।अन्ते ‘एकात्म-धाम’ इत्यस्य वैश्विक-केन्द्ररूपेण विकासस्य योजनाः अपि प्रस्तुताः, येन अद्वैत-वेदान्तस्य प्रसारः अधिकं सुदृढः भविष्यति।

आचार्य-शङ्कर-सांस्कृतिक-एकता-न्यासस्य उप-मुख्य-कार्यपालन-अधिकारी डॉ.शैलेन्द्र-मिश्रः स्वागत-भाषणे उक्तवान् यत् शङ्कराचार्यस्य प्राकट्योत्सवस्य अवसरस्य निमित्तेन ओंकारेश्वरं वैश्विक-एकात्मता-केन्द्ररूपेण विकसितं क्रियते। सः २०२५-वर्षे प्रयागराजे आयोजितस्य एकात्म-धाम-शिविरस्य उल्लेखं कृत्वा उक्तवान् यत् तस्मिन् अद्वैत-वेदान्त-केंद्रिताः संवादाः, ध्यानम्, शास्त्रार्थाः तथा वैदिक-अनुष्ठानानि सफलतया आयोजितानि अभवन्।

अग्रिमं सिंहस्थ-२०२८-पूर्वं जनवरी-मासात् अप्रैल-मासपर्यन्तं २०२७-वर्षे कलाडीतः केदारनाथं यावत् प्रायः १७ सहस्र-किलोमीटर-परिमिता “एकात्म-यात्रा” प्रस्ताविता अस्ति, यस्यां विविधाः आध्यात्मिक-संस्थाः सहभागिन्यः भविष्यन्ति।

हिन्दुस्थान समाचार / अंशु गुप्ता