अगरतलानगरम् (त्रिपुरा), २१ अप्रैलमासः (हि.स.)। त्रिपुरा-राज्यस्य पश्चिम-त्रिपुरा-जनपदे मोहनपुर-उपमण्डलान्तर्गत-फकीरमुरा-ग्रामे आदि-शङ्कराचार्यस्य शुभ-दिने मङ्गलवासरे “माता-चिन्मयी-सौन्दर्य-मन्दिरम्” इत्यस्य उद्घाटनं मोहनभागवतः (राष्ट्रीय-स्वयंसेवक-संघस्य सरसंघचालकः) कृतवान्। एतत् मन्दिरं माता-त्रिपुरेश्वर्यै समर्पितम् अस्ति। अस्मिन् अवसरे तेन चिन्मय-हरिहर-विद्यालये निःशुल्क-शिक्षा-प्रदानस्य प्रयत्नः प्रशंसितः।

मुख्यातिथिरूपेण भाषमाणः सः अवदत्— “ज्ञानस्य अर्थः केवलं भाषणं न, अपितु सम्यक्-बोधः।” तेन उक्तं यत् विश्वं दीर्घकालात् विविध-दर्शनानां अनुभवम् अकरोत्, परन्तु अधुना पृथिव्यै भारतस्य जीवन-दृष्टेः आवश्यकता अनुभूयते।

सः अवदत् यत् सनातन-धर्मः विश्वाय सम्यक्-दिशां प्रदत्तवान्, मन्दिराणि च भारतीय-सामाजिक-जीवनस्य केन्द्रबिन्दवः सन्ति। अद्य शक्त्या सह भक्तेः अपि समानतया आवश्यकता वर्तते। समाजः तान् एव स्मरति ये सर्वैः सह मिलित्वा सेवां कुर्वन्ति— एषा एव भारतीय-संस्कृतिः।

तेन उक्तं यत् विविधतायां अपि भारतस्य एकता एव तस्य बलम् अस्ति, किन्तु बाह्य-शक्तयः अस्य विभाजनाय प्रयत्नं कुर्वन्ति, अतः सर्वे सतर्काः भवन्तु। सत्यस्य समर्थनम् एव पर्याप्तं न, तस्य संस्थापनाय शक्तेः आवश्यकता भवति। भारतस्य शक्ति तस्य संस्कृतौ निहिता अस्ति, यः देशः सदा शान्तिं भ्रातृत्वं च प्रोत्साहयति।

समारोहे इन्द्रसेनरेड्डी, जिष्णुदेववर्मा तथा माणिकशाहः अपि उपस्थिताः आसन्।उल्लेखनीयं यत् एतत् मन्दिरम् अद्वितीय-स्थापत्य-आध्यात्मिक-स्मारकरूपेण निर्मितम् अस्ति। अत्र तमिलनाडुतः आनिताः २७ कृष्ण-शिलास्तम्भाः सन्ति, ये २७ नक्षत्राणां प्रतीकाः सन्ति। मन्दिरं पारम्परिक-छदन-विनिर्मुक्तं निर्मितम्, मध्ये १५-फुट-उच्च माता-त्रिपुरसुन्दरी-मूर्ति प्रतिष्ठिता अस्ति। परिसरस्य भित्तिषु “सौन्दर्य-लहरी”-आदिनां भक्तिग्रन्थानां नक्काशयः अपि दृश्यन्ते, येन तस्य आध्यात्मिक-महत्त्वं वर्धितम्।

हिन्दुस्थान समाचार / अंशु गुप्ता