हरिद्वारनगरम्, २१ अप्रैलमासः (हि.स.)। पश्चिम-उत्तरप्रदेशस्य एकः मुस्लिम-परिवारः मङ्गलवासरे उत्तराखण्डस्य हरिद्वार-नगरे विधिविधानपूर्वकं सनातन-धर्मं स्वीकृतवान्। धार्मिक-संस्थाः साधु-सन्ताश्च उपस्थितेः मध्ये नमामि-गङ्गे-घट्टे गङ्गा-स्नानं शुद्धिकरणं च कृत्वा परिवारः धर्म-परिवर्तनं कृतवान्।

परिवारस्य प्रमुखः स्वनाम मौ.शहजादात् परिवर्त्य “शङ्करः” इति नाम स्वीकृतवान्, तस्य पत्नी रजिया “सावित्री” इति नाम स्वीकृतवती। ताभ्यां सह द्वे कन्ये एकः पुत्रश्च स्वनामानि क्रमशः “रुक्मिणी”, “दीक्षा” तथा “रुद्रः” इति कृतवन्तः।

अस्मिन् कार्यक्रमे बाबा हठयोगी, रामविशाल-दास-महाराजः, अरुण-कृष्ण-महाराजः, अखाडा-परिषदः सम्बद्धाः सन्ताः अन्ये च साधु-सन्ताः उपस्थिताः आसन्। समग्र-परिवारस्य हवन-यज्ञः शुद्धिकरण-संस्कारः च कृतः। एते संस्काराः आचार्य-कुलदीप-विद्यार्थी तथा अनुज-शास्त्री इत्याभ्यां वैदिक-विधिना सम्पन्नाः।

बाबा हठयोगी उक्तवान् यत् परिवारेण वैदिक-परम्परानुसारं सनातन-धर्मः स्वीकृतः, तेषां कृते हिन्दू-धर्मस्य आचार-परम्पराः अपि शिक्ष्यन्ते। सः एतदपि अवदत् यत् तेषां पूर्वजाः पूर्वं हिन्दवः आसन्, अधुना पुनः “गृह-प्रत्यावर्तनम्” अभवत्।

धर्म-परिवर्तनं कृतवान् शङ्करः (पूर्वं मौ.शहजादः) उक्तवान् यत् तस्य भगवते शिवे प्रगाढा श्रद्धा अस्ति, अतः एव सः एतादृशं निर्णयं कृतवान्। सः एतदपि आरोपितवान् यत् अस्य निर्णयस्य अनन्तरं जनानां पक्षात् तस्मै जीवन-भयम् अनुभूयते।

अरुण-कृष्ण-महाराजस्य अनुसारं परिवारः स्वयमेव अग्रे आगत्य सनातन-धर्मं स्वीकर्तुम् इच्छां व्यक्तवान्। तेन उक्तं यत् अन्येऽपि केचन जनाः “गृह-प्रत्यावर्तनम्” कर्तुम् इच्छन्ति।

हिन्दुस्थान समाचार / अंशु गुप्ता