मुंबई-नगरम्, २१ अप्रैलमासः (हि.स.)। भारतीय-जनता-पक्षस्य वरिष्ठ-नेता तथा पूर्व-सांसदः डॉ.गोपालराव-पाटिलः (९४) मङ्गलवासरे प्रातःकाले लातूर-नगरस्य गैलेक्सी-चिकित्सालये उपचारस्य समये निधनं गतः। सः गत-पञ्चदश-दिनात् आरभ्य अस्वस्थः आसीत् तथा तस्य उपचारः तत्रैव चिकित्सालये प्रचलितः आसीत्। अद्य सायं ५ वादने लातूर-नगरस्य सन्त-तुकाराम-नेशनल-मॉडल-विद्यालयस्य क्रीडाङ्गणे तस्य पार्थिव-शरीरस्य अन्त्येष्टि-क्रिया सम्पादिता भविष्यति।

लातूर-जनपदस्य संरक्षक-मन्त्री शिवेन्द्रसिंह-राजे-भोसले पूर्व-सांसदः गोपालराव-पाटिलस्य निधनं प्रति गाढं शोकं व्यक्तवान्। तेन उक्तं यत् तस्य पार्थिव-शरीरं सामान्य-जनानां दर्शनार्थं शिव-छत्रपति-शिक्षण-संस्थायाः प्राङ्गणे स्थापितं भविष्यति। ततः अनन्तरं तत्रैव क्रीडाङ्गणे सायं ५ वादने अन्त्येष्टि-क्रिया भविष्यति। डॉ.गोपालरावस्य परिवारमध्ये तस्य पत्नी शान्ताबाई-पाटिल:, एकः पुत्रः, तिस्र: पुत्र्यः च सन्ति। तस्य पुत्रः सच्चिदानन्दः अमेरिकादेशे सूचना-प्रौद्योगिकी-परामर्शदाता-रूपेण कार्यं करोति। पुत्र्यः अपि विभिन्नेषु क्षेत्रेषु कार्यरताः सन्ति।

डॉ.गोपालराव-पाटिलस्य जन्म ३ अक्टूबर १९३१ तमे दिने धाराशिव-जनपदे (पूर्वम् उस्मानाबाद-जनपदः) उमरगा-तालुके कवाठा-ग्रामे अभवत्। तेन उस्मानिया-विश्वविद्यालयात् एमबीबीएस तथा डीसीएच उपाधी प्राप्ते। सः दीर्घकालं लातूर-नगरे बाल-रोग-चिकित्सक-रूपेण कार्यं कृतवान्। सः शिव-छत्रपति-शिक्षण-संस्थायाः अध्यक्षः आसीत्। तेन इंडियन-पीडियाट्रिक-एसोसिएशनस्य एका शाखा स्थापिताऽभूत् तथा सः तस्याः प्रथमः अध्यक्षः आसीत्। तेन अनेकेषु राष्ट्रीय-चिकित्सा-सम्मेलनेषु अपि सहभागिता कृता। १९९८ तमे वर्षे तस्मै ‘बेस्ट-डॉक्टर-पार्लियामेंटेरियन’ इति पुरस्कारः प्राप्तः।

डॉ. गोपालराव-पाटिलः १९९४ तः २००० पर्यन्तं राज्यसभायाः सदस्यः आसीत्। तेन वाणिज्य, विदेश-कार्य, रेल-आदि विषयेषु संसदीय-समितिषु कार्यं कृतम्। तेन पूर्व-केंद्रीय-मन्त्री शिवराज-पाटिल-चाकुरकरस्य विरुद्धं लोकसभा-निर्वाचनम् अपि प्रतिस्पर्धितम्। तस्मै पठनम्, भ्रमणम्, ग़ज़ल-श्रवणं च विशेष-रुचिः आसीत्। सः मराठी, हिन्दी, आङ्ग्ल, उर्दू, संस्कृत तथा फ्रेञ्च-भाषाः सम्यक् वक्तुं समर्थः आसीत्।

हिन्दुस्थान समाचार / अंशु गुप्ता