बीदर-नगरम्, २२ अप्रैलमासः (हि.स.)। कर्नाटक-राज्यस्य बीदर-जनपदस्य भालकी-स्थिते श्री-चन्नबसवाश्रमे बुधवासरे डॉ.बसवलिङ्ग-पट्टदेवरु-महास्वामी-महोदयस्य ७५तम-जन्मोत्सव-अवसरे आयोजितस्य अमृत-महोत्सव-कार्यक्रमस्य भव्य-शुभारम्भः अभवत्। अस्मिन् अवसरे भारतस्य उपराष्ट्रपतिः सी. पी. राधाकृष्णन् मुख्यातिथिरूपेण उपस्थितः आसीत्।

स्वस्मिन् सम्बोधने उपराष्ट्रपतिः डॉ.बसवलिङ्ग-पट्टदेवरु-महास्वामी-महोदयस्य सामाजिक-धार्मिक-जनकल्याणकारी-योगदानस्य प्रशंसां कृतवान्। तेन उक्तं यत् महास्वामी स्वजीवनं सेवा-करुणा-मानवता-मूल्यानां कृते समर्पितवान्। तस्य कार्याणि समाजाय प्रेरणादायकानि सन्ति तथा च आगामिनां पीढीनां कृते मार्गदर्शकत्वेन कार्यं कुर्वन्ति।

उपराष्ट्रपतिना महात्मना जगज्योति-बसवन्नेन प्रतिपादितानां जीवन-शिक्षाणां उल्लेखः कृतः। तेन उक्तं यत् बसवन्नस्य विचाराः समानता, सामाजिक-न्यायः तथा करुणा इत्येतेषु आधारिताः सन्ति, ये अद्यतन-समये अपि पूर्णतया प्रासङ्गिकाः सन्ति। तेषां सिद्धान्तानां स्वीकृत्या न्यायपूर्णस्य समतामूलकस्य च समाजस्य निर्माणं सम्भवम् इति सः अवदत्।

अस्मिन् अवसरे कर्नाटक-राज्यपालः थावरचन्द-गहलोतः, कांग्रेस-दलस्य राष्ट्रिय-अध्यक्षः मल्लिकार्जुन-खर्गे, राज्यस्य वन-मन्त्री ईश्वर-खण्ड्रे, रहीम-खानः इत्यादयः अनेके गणमान्याः व्यक्तयः उपस्थिताः आसन्।

कार्यक्रमे बहुसंख्यकानां श्रद्धालूनां अनुयायिनां च उपस्थिति: समग्र-आयोजनं भक्ति-उत्साहाभ्यां परिपूर्णम् अकरोत्।

हिन्दुस्थान समाचार / अंशु गुप्ता