भोपाल-नगरम्, २२ अप्रैलमासः (हि.स.)। मध्यप्रदेश-राज्यस्य धार-जनपदः अधुना अधिकं सुरक्षितः तथा सुदृढ-निरीक्षण-युक्तः भविष्यति। अस्य कृते सेफ-सिटीज-परियोजनायाः अन्तर्गतं नगरस्य समुचित-प्रकाश-व्यवस्था सुनिश्चिता भविष्यति तथा संवेदनशील-स्थानेषु सीसीटीवी-कैमरा-यन्त्राणि स्थापितानि भविष्यन्ति।

महिला-एवं-बाल-विकास-मन्त्रालयेन वर्षे २०२६ कृते देशस्य दश प्रमुख-नगराणि ‘सेफ-सिटीज’ परियोजनायां चयनितानि, यस्मिन् मध्यप्रदेशतः ऐतिहासिकं धार-नगरम् अपि सम्मिलितम् अस्ति। केन्द्र-सर्वकारेण शत-प्रतिशत-वित्त-पोषितायाः अस्याः परियोजनायाः कृते धार-जनपदाय १०-कोटि-रूप्यकाणां राशि-आवंटनस्य प्रावधानं कृतम् अस्ति।

जनसम्पर्क-अधिकारी बिन्दु-सुनीलः बुधवासरे उक्तवान् यत् देशे महिलानां सुरक्षायै वर्षे २०१३ तमे ‘निर्भया-कोषः’ स्थापितः, ततः २०१५ तमे ‘स्मार्ट-सिटी-मिशन’ द्वारा शहरी-विकासः सुरक्षा मानकानि च नूतनं स्वरूपं प्राप्तवन्ति। एषा परियोजना धार-जनपदे न्यूनतमं पञ्च-वर्षाणि यावत् क्रियान्विता भविष्यति।

अस्याः योजनायाः मुख्यं लक्ष्यं सार्वजनिक-स्थलानि महिलानां कृते पूर्णतया भयमुक्तानि तथा सुविधायुक्तानि कर्तुं अस्ति। अस्याः अन्तर्गतं जिला-चिकित्सालयेषु तथा अन्य-स्वास्थ्य-केन्द्रेषु महिलानां परिजनानां च कृते विशेष-प्रतीक्षागृहाणां निर्माणं भविष्यति। अपि च सार्वजनिक-स्थलेषु ‘पिङ्क-शौचालयानां’ निर्माणं तथा पर्यटन-स्थलेषु महिला-अनुकूल-आधारभूत-सुविधानां विस्तारः अपि अस्याः योजनायाः भागः अस्ति।

अतिरिक्तं भौतिक-संसाधनैः सह एषा योजना महिलानां मानसिक-सामाजिक-सशक्तिकरणे अपि बलं ददाति। अस्यां विभिन्न-प्रशिक्षण-कार्यक्रमाः तथा जागरूकता-अभियानानि आयोज्यन्ते, येन समाजे महिला-सुरक्षायाः प्रति संवेदनशीलता वर्धते।

धार-जनपदस्य ऐतिहासिक-पुरातात्त्विक-महत्त्वं दृष्ट्वा अत्र आगच्छन्तीनां महिला-पर्यटकानां कृते विशेष-सुविधाः विकसिताः भविष्यन्ति, येन अस्य जनपदस्य वैश्विक-प्रतिष्ठा अधिकं सुरक्षितं तथा सुलभं च भविष्यति। महिला-एवं-बाल-विकास-विभागेन अस्याः परियोजनायाः त्वरित-प्रभावी-क्रियान्वयनाय रूपरेखा सज्जीकृता अस्ति, येन धार-जनपदः भविष्ये महिला-सुरक्षायाः राष्ट्रीय-आदर्श-रूपेण प्रतिष्ठां प्राप्स्यति।

हिन्दुस्थान समाचार / अंशु गुप्ता