नवदेहली-नगरम्, २२ अप्रैलमासः (हि.स.)। जम्मू-कश्मीर-प्रदेशस्य पहलगाम-क्षेत्रे गतवर्षे घटितस्य आतङ्कवादी-आक्रमणस्य वर्षिकी-अवसरे उपराष्ट्रपतिः सी.पी.-राधाकृष्णन्, प्रधानमन्त्री नरेन्द्र-मोदी, केन्द्रीय-गृह-सहकारिता-मन्त्री अमित-शाहः च बुधवासरे ‘एक्स’ इत्यत्र पीडितेभ्यः श्रद्धाञ्जलिम् अर्पितवन्तः।

उपराष्ट्रपतिः सी.पी.-राधाकृष्णन् पहलगाम-आक्रमणं “भीरूतापूर्णं क्रूरं च कृत्यम्” इति निरूप्य उक्तवान् यत् अस्मिन् नष्टानि जीवनानि अस्माकं सामूहिक-स्मृतौ सदा जीविष्यन्ति। सः पीडित-परिवारान् प्रति ऐक्यभावं व्यक्तवान् तथा च उक्तवान् यत् एतादृशानि कृत्यानि शान्तेः, एकतायाः, मानवतायाः च मूल्यानि दुर्बलानि कर्तुं न शक्नुवन्ति। वयं आतङ्कवादस्य सर्वेषु रूपेषु अभिव्यक्तिषु च विरोधं कर्तुं दृढ-संकल्पेन स्थिताः स्मः।

प्रधानमन्त्री नरेन्द्र-मोदी स्वसन्देशे गतवर्षे अस्मिन्नेव दिने पहलगामे जातस्य भीषण-आतङ्कवादी-आक्रमणस्य निर्दोष-निहतान् प्रति श्रद्धाञ्जलिं अर्पितवान्। सः उक्तवान् यत् ते कदापि न विस्मरिष्यन्ति। सः एतस्मिन् दुःख-समये तेषां परिवारैः सह राष्ट्रस्य अटूट-प्रतिबद्धतां पुनः प्रतिपादितवान्।

प्रधानमन्त्री उक्तवान् यत् राष्ट्रं अस्मिन् दुःख-समये एकतया स्थितम् अस्ति तथा च आतङ्कवाद-विरुद्धं तस्य दृढः संकल्पः अटूटः अस्ति। सः पुनरुक्तवान् यत् भारतदेशः आतङ्कवादस्य कस्यापि रूपस्य समक्षं कदापि न नमिष्यति तथा च आतङ्कवादिनां दुष्ट-संकल्पाः कदापि सफलाः न भविष्यन्ति। सः उक्तवान्— “वयं राष्ट्ररूपेण शोक-संकल्पयोः एकीकृताः स्मः। भारतम् आतङ्कवादस्य कस्यापि रूपस्य समक्षं कदापि न नमिष्यति, आतङ्कवादिनां घृणिताः अभिप्रायाः कदापि सफलाः न भविष्यन्ति।”

केन्द्रीय-गृह-सहकारिता-मन्त्री अमित-शाहः उक्तवान् यत् अस्य आक्रमणस्य वेदना अद्यापि प्रत्येकस्य भारतीयस्य हृदि वर्तते। सः आतङ्कवादं “मानवतेः महान् शत्रुः” इति उक्त्वा अवदत् यत् अस्य विरुद्धं राष्ट्रं एकतया युद्धं कर्तव्यम्। शाहः अपि स्पष्टं कृतवान् यत् भारतम् आतङ्कवादस्य तथा तस्य समर्थनकर्तॄणां विरुद्धं स्वस्य शून्य-सहिष्णुता-नीतिं निरन्तरं अनुसरिष्यति। उल्लेखनीयं यत् २२ अप्रैल २०२५ तमे दिने पहलगाम-स्थिते बेसरन-घाटी-प्रदेशे लश्कर-ए-तैयबा तथा टीआरएफ इत्ययोः आतङ्कवादिभिः पर्यटकेषु सुनियोजितम् आक्रमणं कृत्वा षट्-विंशतिः (२६) जनाः हताः। एतत् आक्रमणं धर्माधारेण लक्ष्यीकृत्य साम्प्रदायिक-अशान्तेः प्रसारणार्थं कृतम्।

हिन्दुस्थान समाचार / अंशु गुप्ता