कोलकाता, 24 अप्रैलमासः (हि.स.)।पश्चिमबङ्गराज्यस्य निर्वाचनसङ्ग्रामस्य मध्ये प्रधानमन्त्री नरेन्द्रमोदी निरन्तरं चर्चासु वर्तते। झारग्रामनगरे झालमुरीभोजनस्य अनन्तरं शुक्रवासरे प्रातःकाले तस्य एकः भिन्नः रूपः दृष्टः। कोलकातानगरस्य गङ्गाघाटे सः नौकाविहारं कृतवान् तथा तत्र उपस्थितैः जनैः सह मिलित्वा संवादं कृतवान्। गङ्गाघाटे अकस्मात् आगतं प्रधानमन्त्रिणं द्रष्टुं जनानां महान् समूहः समागच्छत्। सः प्रोटोकॉलनियमं लङ्घयित्वा जनैः सह मिलित्वा वार्तालापं कृतवान्, एकं जनं आलिङ्ग्य तस्य दुःखकथां श्रुतवान्, यस्य परिणामस्वरूपं सः जनः भावुकः अभवत्। तस्याः घटनायाः चित्राणि शीघ्रं सामाजिकमाध्यमेषु प्रसिद्धानि अभवन्।

पूर्वदिनस्य गुरुवासरे नदियाजिले तथा दक्षिणचतुर्विंशतिपरगणाजिलयोः जनसभाः संबोध्य, बेलूरमठे दर्शनं कृत्वा, हावडानगरे भव्यं रोडशो कृत्वा प्रधानमन्त्री राजभवने रात्रिविश्रामं कृतवान्। प्रातःकाले सः गङ्गानदीतटं प्राप्तवान्, मातुः गङ्गायाः प्रति श्रद्धां प्रदर्शितवान्। सः नौकायाः विहारं कृत्वा हस्ते कैमरा धृत्वा नदीतटस्य, हावडासेतोः, तथा समीपस्थसु मनोहरदृश्येषु चित्राणि गृहीतवान्। एतानि चित्राणि सामाजिकमाध्यमेषु शीघ्रं चर्चायाः विषयः अभवन्।

प्रधानमन्त्री एक्समाध्यमेन चित्राणि साझीकृत्य उक्तवान् यत् प्रत्येकस्य बङ्गालीजनस्य हृदये गङ्गायाः विशेषं स्थानं वर्तते। सः अवदत् यत् गङ्गा केवलं नदी नास्ति, किन्तु बङ्गालप्रदेशस्य आत्मनि प्रवहमानः सांस्कृतिकप्रवाहः अस्ति। मातुः गङ्गायाः पावनं जलं स्वस्मिन् पूर्णस्य सभ्यतायाः शाश्वतचेतनां वहति।

गङ्गातटे स्थितकाले प्रधानमन्त्री स्थानीयैः नाविकैः प्रातःभ्रमणार्थं निर्गतैः जनैः च सह मिलितवान्। सः नाविकानां परिश्रमं अनुशासनं कर्मठतां च प्रशंसितवान्, तान् प्रेरणादायकान् इति उक्तवान्। प्रधानमन्त्री अवदत् यत् हुगलीनदीतटे व्यतीतः अयं समयः मातुः गङ्गायाः प्रति कृतज्ञतां व्यक्तुं अवसरः आसीत्, तथा पश्चिमबङ्गराज्यस्य विकासाय तत्रस्थितजनानां समृद्धये च संयुक्तरूपेण कार्यं कर्तुं प्रतिबद्धता अपि पुनरुक्ता।

उल्लेखनीयम् अस्ति यत् पूर्वं गुरुवासरे सः हावडानगरात् कोलकातानगरं यावत् विशालं रोडशो कृतवान्, यस्मिन् जनसागरः दृष्टः। तेन उक्तं यत् बङ्गालप्रदेशस्य सर्वत्र परिवर्तनस्य इच्छा स्पष्टतया दृश्यते। शुक्रवासरे अपि प्रधानमन्त्री नरेन्द्रमोदी द्वे जनसभे संबोधयिष्यति।

हिन्दुस्थान समाचार