उज्जैन-नगरम्, २५ अप्रैलमास: (हि.स.)। बिहार-राज्यस्य पूर्व-उपमुख्यमन्त्री विजय-कुमार-सिन्हा सपत्नीकं मध्यप्रदेश-राज्यस्य उज्जैन-नगरम् आगत्य विश्वप्रसिद्धं ज्योतिर्लिङ्गं भगवत: महाकालस्य दर्शनं कृतवान्।

सः स्वपत्न्या सुशीला-देव्या सह भस्म-आरार्तिक्याम् अपि सम्मिलितः भूत्वा बाबा-महाकालस्य आशीर्वादं प्राप्तवान् तथा च बिहार-राज्यस्य समृद्ध्यै, कल्याणाय, सनातन-संस्कृतेः च सकारात्मक-ऊर्जायै प्रार्थनां कृतवान्।

बिहार-राज्ये अधुना नूतन-सर्वकार-निर्माणस्य प्रक्रिया प्रचलति। एकस्मिन् दिने पूर्वं एव नूतनः मुख्यमन्त्री सम्राट-चौधरी विश्वासमतं प्राप्तवान्। एतस्मिन् एव काले विजय-कुमार-सिन्हा शनिवासरे प्रातःकाले उज्जैनं प्राप्तवान्।

तत्र सः महाकालेश्वर-मन्दिरे नन्दीसभागारे उपविश्य भस्म-आरार्त्या: दर्शनं कृतवान् तथा भगवत: महाकालस्य स्मरणं कृतवान्। आरार्तिक्या: अनन्तरं सः नन्दीदेवस्य पूजनं-अभिषेकं कृत्वा कर्णे स्वमनोरथं अपि उक्तवान्। सः मन्दिरस्य रजत-द्वारेण भगवान् महाकालाय जलं समर्पितवान्। अस्मिन् काले पुरोहितैः विधिवत् पूजन-अभिषेकः कृतः।

दर्शनानन्तरं सः उक्तवान् यत् कालानां कालस्य महाकालस्य नगरी उज्जयिनी आध्यात्मिक-ऊर्जया परिपूर्णा अस्ति। सः प्रार्थितवान् यत् सर्वेषां बिहारवासिनां गौरवं रक्षितं भवतु, सर्वे स्वस्थाः भवन्तु, महाकालस्य कृपा सर्वेषां उपरि भवतु।

भस्म-आरार्तिक्या: भव्यः श्रृङ्गारः, श्रद्धालूनां च महाजनसमागमः अभवत्। शनिवासरे प्रातःकाले वैशाख-शुक्ल-नवम्यां भस्म-आरार्तिक्यां भगवान् महाकालः विशेष-श्रृङ्गारेण अलङ्कृतः आसीत्। आरत्याः समये मन्दिरे “जय महाकाल” इति जयघोषः सर्वत्र गुञ्जितः।

हिन्दुस्थान समाचार / अंशु गुप्ता