गुमला-नगरम्, २९ अप्रैलमासः (हि.स.)। विद्या-भारती-योजनायाः अन्तर्गतं गुमला-नगरस्य सरस्वती-शिशु-विद्या-मन्दिरे बुधवासरे दादा-दादी तथा नाना-नानी-सम्मान-समारोहस्य भावपूर्णं प्रेरणादायकं च आयोजनम् अभवत्। कार्यक्रमस्य मुख्योद्देश्यं बालकान् पारिवारिक-संस्कारैः भारतीय-मूल्यैः च सम्बद्धयितुम् आसीत्।

कार्यक्रमस्य शुभारम्भः प्रबन्धन-समितेः सचिवेन विजय-बहादुर-सिंहेन, प्रधानाचार्येण जितेन्द्र-तिवारी तथा मुख्यातिथिभ्यां लक्ष्मी-नारायण-सिंहेन तथा मीना-देव्या दीप-प्रज्वलनेन कृतः।

ततः अनन्तरं वाटिका-वर्गस्य बालकैः मनोहराः सांस्कृतिक-प्रस्तुतयः प्रदर्शिताः, येन सर्वेषां मनांसि आकृष्टानि। समारोहस्य अत्यन्तं भावुकः क्षणः तदा अभवत्, यदा बालकैः स्वेषां पितामह-पितामहीभ्य: तथा मातामह-मातामहीभ्यः तिलकं कृत्वा, मिष्टान्नं भोजयित्वा तथा चरण-वन्दनं कृत्वा तेषां सम्मानं कृतम्। स्वेषां पौत्र-पौत्रीणां स्नेहं सम्मानं च प्राप्य वृद्धाः अत्यन्तं भावुकाः अभवन्।

प्रधानाचार्यः जितेन्द्र-तिवारी स्वीये सम्बोधने उक्तवान् यत् अद्यतन-काले वृद्धाः अस्माकं सांस्कृतिक-परम्परायाः वाहकाः सन्ति, ते च नववंशाय संस्कारान् प्रेषयितुं महत्त्वपूर्णां भूमिकां निर्वहन्ति।

विजय-बहादुर-सिंहः उक्तवान् यत् आधुनिक-जीवन-शैलीषु वृद्धाः प्रायः उपेक्षिताः अनुभवन्ति। एतादृशाः कार्यक्रमाः तान् परिवारैः सह पुनः संयोजयितुं सशक्तं माध्यमं भवन्ति।

मुख्य-अतिथिः लक्ष्मी-नारायण-सिंहः अस्य उपक्रमस्य प्रशंसां कृत्वा तम् अद्वितीयम् अनुकरणीयं च अभिधातवान्। तेन उक्तं यत् एतादृशाः कार्यक्रमाः सर्वेषु विद्यालयेषु आयोजनीयाः, येन पारिवारिक-सम्बन्धाः अधिकं सुदृढाः भवन्ति।

कार्यक्रमस्य मंच-सञ्चालनं उमा-कुमार्या कृतम्, अतिथि-परिचयः विकास-कुमारेण प्रस्तुतः। कार्यक्रमस्य सफलायोजने आचार्याया: अर्चना-मिश्रायाः महत्त्वपूर्णा भूमिका आसीत्।

हिन्दुस्थान समाचार / अंशु गुप्ता