Enter your Email Address to subscribe to our newsletters
वाराणसी (उत्तर प्रदेशः),29 अप्रैलमासः (हि.स.)।प्रधानमन्त्री नरेन्द्र मोदी द्विदिवसीय-वाराणसी-भ्रमणस्य अन्तिमे दिने अद्य प्रातः काशिपुराधिपतेः बाबा विश्वनाथस्य स्वर्णिम-दरबारस्य दर्शन-पूजनार्थं बरेका-आतिथ्यगृहात् निर्गतः। यदा तस्य वाहन-श्रेणी बरेका-मुख्यद्वारम् अगच्छत्, तदा भाजपा-कार्यकर्तारः शङ्खध्वनिना पुष्पवर्षया च विजयी-नायकवत् तस्य भव्यं स्वागतं कृतवन्तः।
प्रधानमन्त्रिणः वाहन-श्रेणी श्रीकाशी-विश्वनाथ-मन्दिरं प्रति गच्छन्ती सति मार्गे भाजपा-कार्यकर्तारः ढोल-नगाडानां निनादेन गगनभेदी “मोदी मोदी” इति घोषैः सह गुलाब-पुष्पाणां वर्षां कृतवन्तः। कार्यकर्तारः नागरिकाश्च “जय जय श्रीराम”, “हर हर महादेव” इति उद्घोषान् अकुर्वन्। स्त्री-कार्यकर्तॄणां नागरिकानां च उत्साहं दृष्ट्वा प्रधानमन्त्रिणः वाहन-श्रेणी शनैः शनैः अग्रे प्रस्थितवती।
प्रधानमन्त्री ककरमत्ता-आरओबी मार्गेण मण्डुवाडीह-चतुष्पथं, ततः फुलवरिया-उड्डयनपुलं, सेंट्रल-जेल-मार्गस्य हॉकी-चतुष्पथं च गत्वा रोड-शो कृत्वा अग्रे गतवान्। ततः जेपी-मेहता-तिराहात् आंबेडकर-चतुष्पथं, कचहरी-गोलघरं, पुलिस-लाइन-तिराहं च प्राप्तवान्। पुलिस-लाइन-तिराहात् मकबूल-आलम-मार्गेण चौकाघाटं, लहुराबीरं, कबीरचौरां, मैदागिनं च अतिक्रम्य प्रायः १४ किलोमीटर दूरीं गत्वा मन्दिरं प्राप्तवान्।
अस्य १४ किलोमीटर-दीर्घे मार्गे भाजपा-वाराणसी-जिला-महानगर-इकाई पञ्च स्वागत-बिन्दून् निर्मितवती। प्रत्येके स्वागत-बिन्दौ मार्गस्य उभयतः स्थिताः नागरिकाः भाजपा-कार्यकर्तारश्च वाहन-श्रेण्यां प्रधानमन्त्रिणं दृष्ट्वा “मोदी मोदी” इति घोषं कृतवन्तः। स्वकीय-काशी-निवासिनां स्नेहं प्रेम च दृष्ट्वा हृष्टः प्रधानमन्त्री कदाचित् अञ्जलिं कृत्वा, कदाचित् हस्तं सञ्चालयित्वा नागरिकानां अभिवादनं स्वीकृतवान्। स्वागतार्थं प्रातःकालादेव तिष्ठन्तः कार्यकर्तारः अत्युत्साहेन तत्र अवस्थिताः आसन्।
मार्गे स्त्रियः बालकाश्च स्वगृहाणां छदेषु बाल्कनीषु च स्थित्वा प्रधानमन्त्रिणं द्रष्टुं पुष्पवर्षां कर्तुं च उत्सुकाः दृष्टाः। मार्गस्य पार्श्वयोः स्थितेषु बैरिकेडेषु युवानः स्त्रियश्च स्थिताः सन्तः दृष्ट्वा प्रधानमन्त्री अपि अञ्जलिं कृत्वा तेषां अभिवादनं स्वीकृतवान्। जनाः प्रधानमन्त्रिणः एकां झलकां द्रष्टुं दीर्घकालं यावत् तत्रैव स्थिताः आसन्।
एतत् पूर्वं प्रधानमन्त्रिणः रोड-शो निमित्तं मैदागिनात् श्रीकाशी-विश्वनाथ-धाम पर्यन्तं यातायातः पूर्णतया निरुद्धः। पदचारिणः अपि मार्गपार्श्वे स्थापिताः। प्रातः सप्तवादने अपर-पुलिस-आयुक्तः शिवहरी-मीणा मैदागिनात् काशी-विश्वनाथ पर्यन्तं निरीक्षणं कृतवान्। वाहन-आवागमनं निषिद्धं कृत्वा मार्गः शुद्धीकृतः।
हिन्दुस्थान समाचार