Enter your Email Address to subscribe to our newsletters
वाराणसी-नगरम् (उत्तरप्रदेशः), २९ अप्रैलमासः (हि.स.)। भारतस्य प्रधानमन्त्री नरेन्द्रमोदी-महाभागः स्वीयस्य द्विदिनात्मक-वाराणसी-प्रवासस्य अन्तिमे दिने बुधवासरे प्रातःकाले काशीपुराधिपतेः बाबा-विश्वनाथस्य स्वर्णिम-दरबारे विधिवत् उपस्थितिं कृतवान्। वैदिक-मन्त्र-उच्चारणस्य मध्ये मन्दिरस्य स्वर्णमण्डिते गर्भगृहे बाबा-विश्वनाथस्य पावन-ज्योतिर्लिङ्गस्य षोडशोपचार-पूजा-अभिषेकं अर्चक-ओम्-प्रकाश-मिश्रः अन्यैः च पञ्चभिः ब्राह्मणैः सह सम्पन्नम्। अस्मिन् समये प्रधानमन्त्री अपि मन्त्रान् उच्चारयन् काशीपुराधिपतेः प्रति स्वीयम् अनुरागं श्रद्धाभावं च प्रदर्श्य देशस्य सुख-समृद्ध्यै मंगलकामनां कृतवान्।
दर्शन-पूजनस्य अनन्तरं प्रधानमन्त्री मन्दिर-परिसरे उपस्थितानां शिवभक्तानां अभिवादनं कृतवान्। काश्याः ५४-तमं प्रवासं कृतवान् प्रधानमन्त्री काशी-विश्वनाथ-मन्दिरे ५१ ब्राह्मणानां शङ्खध्वन्या सह प्रविष्टः। अस्मिन् अवसरे “हर-हर महादेव” इति जयघोषाः अभवन्। धाम्नि डमरू-निनादैः बटुकानां शङ्खनादैः च सह मन्दिर-न्यासस्य अध्यक्षः अन्ये पदाधिकाऱिणः च प्रधानमन्त्रिणः स्वागतं कृतवन्तः। विधिवत् दर्शन-पूजनं कृत्वा प्रधानमन्त्री हरदोई-नगरं प्रति गन्तुं बाबतपुर-विमानतलं प्रति प्रस्थितः।
अस्मात् पूर्वं प्रातःकाले प्रायेण अष्टवादने प्रधानमन्त्री बरेका-आतिथ्य-गृहात् श्री-काशी-विश्वनाथ-मन्दिरं प्रति प्रस्थितः। सः ककरमत्ता-आरओबी मार्गेण मण्डुवाडीह-चतुष्पथ:, ततः फुलवरिया-उड्डयनसेतुमार्गेण सेण्ट्रल-जेल-मार्गं यावत् शोभायात्रां कृत्वा गतवान्। ततः जे.पी.-मेहता-तिराहा मार्गेण आम्बेडकर-चतुष्पथ:, कचहरी-गोलघर, ततः पुलिस-लाइन-तिराहा प्राप्तवान्। तस्मात् मकबूल-आलम-मार्गेण चौकाघाट, लहुराबीर, कबीरचौरा, मैदागिन मार्गेण प्रायेण १४ किलोमीटर-परिमितां दूरीं गत्वा मन्दिरं प्राप्तवान्। अस्मिन् मार्गे भाजपाकार्यकर्तारः काशीवासिनः च ढोल-नगाड़-डमरू-शङ्खध्वनिभिः गुलाब-पुष्प-पत्र-वर्षया च “हर-हर महादेव” तथा “जय श्रीराम” इति घोषैः प्रधानमन्त्रिणः अभूतपूर्वं स्वागतं कृतवन्तः। सम्पूर्णे मार्गे जनाः पुष्पवर्षां कृत्वा स्वीयं स्नेहं प्रदर्शितवन्तः। जनानां प्रेम-स्नेह-आत्मीयतया अभिभूतः प्रधानमन्त्री हस्तं चलयन् तेषां अभिवादनं स्वीकृत्य अग्रे गतवान्।
दर्शन-पूजनस्य अनन्तरं प्रधानमन्त्रिणे भाजपाया: स्थानीय-नेतारः त्रिशूलं डमरू च उपहाररूपेण दत्तवन्तः। ततः प्रधानमन्त्री तौ दर्शयित्वा शिवभक्तानां “हर-हर महादेव” इति घोषस्य प्रत्युत्तरं कृतवान्। अस्मिन् अवसरे महापौरः अशोक-तिवारी, प्रदेशस्य मन्त्री अनिल: राजभर-महाभागः अन्ये च उपस्थिताः आसन्।
प्रधानमन्त्री नरेन्द्र मोदी-महाभागः श्री-काशी-विश्वनाथ-मन्दिरे दर्शन-पूजनस्य अनन्तरं मन्दिर-चतुष्पथे आगतान् बालकान् प्रति स्नेहं प्रदर्श्य तैः सह संवादं कृतवान्, स्नेहेन तेषां शिरांसि स्पृष्टवान्। तेन पृष्टेषु प्रश्नेषु बालकाः हर्षेण प्रसन्नाः दृश्यन्ते स्म।
हिन्दुस्थान समाचार / अंशु गुप्ता