Enter your Email Address to subscribe to our newsletters
केन्द्रीय-गृह-सहकारिता-मन्त्री अमित-शाहः शुक्रवासरे लद्दाख-प्रदेशस्य लेह-नगरे स्थिते केन्द्रीय-बौद्ध-अध्ययन-संस्थाने (सीआईबीएस) आयोजिते कार्यक्रमे दुग्ध-उद्योग-सहकारिता-क्षेत्रे सम्बद्धानां अनेकानां महत्त्वपूर्ण-परियोजनानां उद्घाटनं शिलान्यासं च करिष्यति। अस्मिन् अवसरे केन्द्रीय-मत्स्य-पशुपालन-दुग्ध-विकास-मन्त्री राजीव-रञ्जन-सिंह: (ललन-सिंह) तथा लद्दाख-प्रदेशस्य उपराज्यपालः विनय-कुमार-सक्सेना उपस्थितौ भविष्यतः।
सहकारिता-मन्त्रालयस्य अनुसारं कार्यक्रमस्य अन्तर्गतं लद्दाखे दुग्ध-अवसंरचनायाः सुदृढीकरणाय अनेकाः महत्त्वपूर्णाः प्रयत्ना: क्रियन्ते। कारगिल-क्षेत्रे प्रति-दिनं दश-टन-क्षमतायुक्तस्य दुग्ध-प्रसंस्करण-केन्द्रस्य आधारशिला स्थाप्यते, लेह-नगरे च दधि-पनीर-उत्पादन-एककानां उद्घाटनं क्रियते। सहैव दुग्ध-भण्डारण-परिवहनयोः सुदृढीकरणाय ‘बल्क-मिल्क-कूलर’-प्रणाली अपि आरभ्यते।
सहकारी-क्षेत्रे डिजिटल-सशक्तीकरणस्य प्रवर्धनाय ‘एण्ड्रॉयड-आधारित-स्वचालित-दुग्ध-संग्रह-प्रणाली’ (एएमसीएस) अनुप्रयोगः अपि उद्घाट्यते, येन दुग्ध-क्रय-प्रक्रियायां पारदर्शिता वर्धते तथा कृषकाणां कृते भुगतान-प्रक्रिया सुलभा भवति।
एतदतिरिक्तं दुग्धस्य गुणवत्ता-निश्चयार्थं एकं चल-दुग्ध-परीक्षण-प्रयोगशाला-यानं अपि प्रारभ्यते। दुग्ध-उत्पादानां विपणन-वितरणयोः संवर्धनाय विभिन्न-हितधारकाणां मध्ये सन्धि-ज्ञापनानि (एमओयू) अपि हस्ताक्षरितानि भविष्यन्ति, येन स्थानीय-उत्पादकानां कृते उत्तमः बाजारः उपलब्धः भविष्यति।
कार्यक्रमे क्षेत्रस्य प्रगतिशीलाः दुग्ध-कृषकाः सम्मानिताः अपि भविष्यन्ति। एषा पहलः “सहकारात् समृद्धिः” इति दृष्टेः उन्नयनाय तथा दूरस्थ-प्रदेशेषु ग्रामीण-अर्थव्यवस्थायाः सशक्तीकरणाय एकः महत्त्वपूर्णः पदक्षेप: मन्यते।
हिन्दुस्थान समाचार / अंशु गुप्ता