Enter your Email Address to subscribe to our newsletters
वाराणसी-नगरम्, ३० अप्रैलमासः (हि.स.)। जम्बूद्वीप-श्रीलङ्कन-बौद्ध-मन्दिरस्य (सारनाथ) वरिष्ठः बौद्ध-भिक्षुः विहाराधिपतिः च डॉ. के.श्रीसुमेध-महाथेरः अवदत् यत् करुणा, मैत्री, प्रज्ञा च—एते त्रयः तत्त्वानि मानव-जीवनं सन्तुलितं सार्थकं च कुर्वन्ति। बौद्ध-दर्शनं जीवनस्य विज्ञानम् अस्ति, यत् आत्मानुशासन-तर्कशीलता-अनुभवजन्य-सत्येषु आधारितम् अस्ति। सः गुरुवासरे सम्पूर्णानन्द-संस्कृत-विश्वविद्यालये गोष्ठ्यां भाषमाणः आसीत्।
बुद्ध-जयंती-पर्वणः पूर्वसन्ध्यायां श्रमण-विद्या-संकायस्य धर्म-संस्कृति-संगमस्य च तत्वावधाने आयोजितायां ‘धर्म-संस्कृति-समन्वये भगवान् बुद्धस्य योगदानम्’ इति विषयक-गोष्ठ्यां महाथेरः बौद्ध-साधनायाः व्यावहारिक-पक्षान् निरूपितवान्। सः मुख्यातिथिरूपेण अवदत् यत् भगवान् बुद्धेन प्रतिपादितः मार्गः अद्यापि वैश्विक-शान्तेः, सहिष्णुतायाः संवाद-संस्कृतेः च सुदृढीकरणे अत्यन्तं प्रासङ्गिकः अस्ति। बौद्ध-धर्मः भारतीय-संस्कृतेः प्रथमः वैश्विक-दूतः अस्ति, येन गौतम-बुद्धस्य करुणा, अहिंसा, मध्यम-मार्गस्य शिक्षाभिः भारतस्य सांस्कृतिक-मूल्यानि विश्वे प्रतिष्ठितानि।
विशिष्ट-अतिथिः प्रो.अरुण-कुमार-यादवः (पालि-बौद्ध-अध्ययन-विभागाध्यक्षः, बीएचयू) अवदत् यत् पालि-साहित्यं बौद्ध-ग्रन्थाश्च भारतीय-संस्कृतेः अमूल्या धरोहराः सन्ति, यत्र जीवनस्य गूढतमाः सत्यानि सरल-व्यावहारिक-रूपेण निरूपितानि सन्ति। राष्ट्रीय-सचिवः धर्म-संस्कृति-संगमस्य दीनदयाल-पाण्डेयः अवदत् यत् धर्मस्य संस्कृतेः च मूल-उद्देश्यं समाजे समरसता-नैतिकता-मानवीय-मूल्यानां स्थापना एव अस्ति, यत् भगवान् बुद्धेन स्वजीवनेनोपदेशैः च साकारितम्।
गोष्ठ्याः अध्यक्षतां कुर्वन् विश्वविद्यालयस्य कुलपतिः प्रो. बिहारी-लाल-शर्मा अवदत् यत् भगवत: बुद्धस्य दर्शनं भारतीय-ज्ञान-परम्परायाः तस्याः धारा प्रतिनिधित्वं करोति, यत्र समन्वयः, करुणा, अहिंसा, मध्यम-मार्गः च निहिताः सन्ति। सः अवदत् यत् बुद्धस्य चिन्तनं न केवलं आध्यात्मिक-साधनायां सीमितम्, अपि तु सामाजिक-समरसता-नैतिक-अनुशासन-मानवीय-मूल्यानां पुनर्स्थापनायाः सशक्तः आधारः अस्ति।
कार्यक्रमस्य संयोजकः प्रो.रमेश-प्रसादः अतिथीनां प्रतिभागिनां च स्वागतं कृतवान्। संचालनं डॉ.विजय-कुमार-शर्मा कृतवान्, धन्यवाद-ज्ञापनं डॉ.लेखामणि-त्रिपाठी कृतवान्। गोष्ठ्यां प्रो. रामपूजन-पाण्डेयः, प्रो.जीतेन्द्र-कुमारः, प्रो.शैलेश-कुमार-मिश्रः, प्रो.राजनाथः, प्रो.विद्या-कुमारी, प्रो.अमित-कुमार-शुक्लः इत्यादयः अपि उपस्थिताः आसन्।
हिन्दुस्थान समाचार / अंशु गुप्ता