कोलकातानगरम्, ०४ अप्रैलमासः (हि.स.)। ‘वन्दे मातरम्’ इति गीतस्य १५०-वर्ष-पूर्णतायाः अवसरे कोलकाता-स्थिते राष्ट्रीय-पुस्तकालये शुक्रवासरे अपराह्णे विशेष-कार्यक्रमस्य आयोजनं कृतम्। कार्यक्रमस्य आरम्भः सामूहिकरूपेण ‘वन्दे मातरम्’ इत्यस्य गायनेन अभवत्, येन सह सम्पूर्णे सभागारे देशभक्तेः वातावरणं निर्मितम्।

कार्यक्रमस्य प्रारम्भे छत्तीसगढ़-राज्यस्य उपमुख्यमन्त्री विजय-शर्मा सम्बोधनं कृतवान्। तेन स्वीय-वक्तव्ये ‘वन्दे मातरम्’ गीतस्य ऐतिहासिक-महत्त्वं तथा वर्तमान-काले तस्य प्रासंगिकतायाः विषये प्रकाशः दत्तः।

ततः परं कोलकाता-स्थितस्य अरविन्द-भवनस्य निदेशकः विश्वजीत-गांगुली स्व-विचारान् प्रकटितवान्। तेन उक्तं यत् एतादृशाः कार्यक्रमाः नूतन-वंशं देशस्य इतिहासेन संस्कृत्या च संयोजयितुं महत्त्वपूर्णां भूमिकां निर्वहन्ति। कार्यक्रमे अन्येऽपि बहवः विशिष्ट-व्यक्तयः उपस्थिताः आसन्, येषां द्वारा देशभक्तेः तथा स्वतन्त्रता-सैनिकानां योगदानस्य स्मरणं कृतम्।

कार्यक्रमस्य एका महत्त्वपूर्णा विशेषता स्वतन्त्रता-सैनिकानां परिवार-सदस्यानां उपस्थितिः आसीत्। अस्मिन् अवसरे अनेकैः एषा चिन्ता व्यक्ता यत् अग्रिम-वंशस्य स्वतन्त्रता-सैनिकानां त्यागं बलिदानं च कीयत् स्मरिष्यन्ति, तेषां इतिहासं च कीयत् महत्त्वं दास्यन्ति। तैः नूतन-वंशे जागरूकता-वर्धनस्य आवश्यकता अपि बलात् उक्ता।

सांस्कृतिक-सत्रे अनेकानि देशभक्ति-गीतानि प्रस्तुतानि। ‘मुक्तेः मन्दिरस्य सोपान-तले’ इति गीतस्य प्रस्तुतिः दिग्विजय-चौधरी कृतवान्, या दर्शकैः अत्यन्तं प्रशंसिता। अन्याभिः प्रस्तुतिभिः अपि देशं प्रति प्रेम-समादरयोः भावना व्यक्ता।

सम्पूर्णे कार्यक्रमे देशभक्तेः भावः स्पष्टतया दृश्यते स्म। स्वतन्त्रता-सैनिकेभ्यः श्रद्धाञ्जलिं समर्प्य ‘वन्दे मातरम्’ इति ऐतिहासिक-गीतं केन्द्रे स्थाप्य आयोजितः अयं कार्यक्रमः नूतन-वंशं देशस्य इतिहासं सांस्कृतिक-परम्परां च ज्ञातुं सम्मानयितुं च महत्त्वपूर्णं सन्देशं दत्तवान्।

हिन्दुस्थान समाचार / अंशु गुप्ता